कलुवापुर–बेलौरी सडकको कालोपत्र छिट्टै सुरु हुने

कञ्चनपुर: परराष्ट्रमन्त्री नारायणप्रकाश साउँदले कलुवापुर– बेलौरी सडकखण्डको कालोपत्र गर्ने कार्यलाई चाँडै अगाडि बढाइने बताएका छन्।

शुक्लाफाँटा नगरपालिका–११ कलुवापुरले आयोजना गरेको कार्यक्रममा मन्तव्य राख्दै उनले चुनावका बेला सडक कालोपत्रे गर्ने प्रतिबद्धता गरेको कुरालाई नबिर्सिएको बताए। 'सडकको अवस्थाबारे मलाई राम्ररी थाहा छ', उनले भने, 'अबेर जरुर भएको छ, अन्धेर हुन दिदैनौँ।'

सडकको क्षेत्राधिकार कायम गर्नेबारे नगरपालिकाले समन्वय गर्नुपर्ने उल्लेख गर्दै उनले कालोपत्रका लागि सुदूरपश्चिम प्रदेशका प्रमुख सचिव, भौतिक पूर्वाधार मन्त्रालयका सचिव र निर्माण व्यवसायीलाई निर्देशन दिइसकेको बताए। सडककै लागि गुनासो सुन्नु नपरोस् ठेक्का सम्झौता बमोजिमको कार्य निर्धारित समयभित्रै पूरा गर्न गराउनका लागि निर्माण व्यवसायी र सम्बद्ध पक्षसँग कुरा गरेको उनले बताए।

'सडक कालोपत्रे नहुँदा हिउँदमा धुलाम्मे र बर्सादका बेला हिलाम्मे हुने कुराबारे जानकार छु', उनले भने, 'चिन्ता र चासो लिएर यस कार्यलाई काठमाडौँ फर्केपछि तत्काल अगाडि बढाउन लगाउँछु।' नगरपालिकामा निर्माण हुँदै गरेको फोहरमैला व्यवस्थापन केन्द्रमा फोहर प्रशोधन गर्ने ठूला मेसिन राखेर व्यवस्थित गरिने उनले बताए।

दुई/तीनवटा नगरपालिकाको फोहर व्यवस्थापन गर्ने साझा केन्द्रका रुपमा यसलाई विकास गरिनुपर्ने उनको भनाइ थियो। फोहरमैला व्यवस्थापन केन्द्रको प्रभावित क्षेत्रका बासिन्दाका हितलाई ध्यानमा राखेर कार्य अगाडि बढाइनुपर्नेमा उनको जोड थियो। बहुवर्षीय ठेक्का सम्झौता गरी झलारी बजार क्षेत्र भएर बग्ने सनवोरा नदीमा बलियो तटबन्ध निर्माणका लागि पहल गर्ने उनले व्यक्त गरे।

विकास गर्ने कुरा जनप्रतिनिधको दायित्वभित्र पर्ने कुरा भएकाले यसबाट पछि हट्न नमिल्ने उनको जिकिर थियो। शुक्लाफाँटा नगरपालिका–११ का वडाध्यक्ष शेरबहादुर साउँदले मन्त्री साउँदलाई २२ बुँदे मागसहितको ज्ञापनपत्र बुझाएका थिए। मन्त्री साउँदलाई बुझाइएको ज्ञापनपत्रमा कलुवापुर–बेलौरी सडकखण्ड कालोपत्रे गर्ने, रामजानकी मन्दिरमा विवाह मण्डप निर्माणसम्मका योजना समेटिएका छन्।

यसैगरी, कलुवापुर बजार क्षेत्रमा ढल निकास, वडा कार्यालय तथा आधारभूत स्वास्थ्य सेवा केन्द्र वरिपरि पर्खाल निर्माण, प्रादेशिक आयुर्वेदिक अस्पतालको यथाशीघ्र निर्माण, सामुदायिक भूमि व्यवस्थापन स्रोत केन्द्रको कार्यालय भवन निर्माण, वडामा खेलमैदान तथा कभर्ड हल निर्माणको माग ज्ञापनत्रमा गरिएको छ। रासस