बझाङमा मोटरसाइकलले ठक्कर दिदा महिला घाइते

धनगढीः बझाङमा मोटरसाइकलको ठक्करबाट एक महिला घाइते भएकी छिन्। जयपृथ्वी राजमार्ग अन्तर्गत जिल्लाको केदारस्यु गाउँपालिका १ चौडाममा मोटरसाइकलको ठक्करबाट २९ वर्षीय खिमेश्वरी भण्डारी घाइते भएकी हुन्।

बिहिवार बिहाने बित्थडचिर गाउँपालिकाबाट छविसपाथिभेरा गाउँपालिका तर्फ गइरहेको से। १ ब। ६०० नम्बरको छविसपाथिभेरा गाउँपालिकाको सरकारी मोटरसाइकलले भण्डारीलाई सडक पार गर्ने क्रममा ठक्कर दिएको हो। 

जिल्ला प्रहरी कार्यालय बझाङका प्रहरी निरीक्षक एवं सूचना अधिकारी दिपेश चौधरीका अनुसार मोटरसाइकलको ठक्करबाट उनको कम्मर, पेट र हातमा चोट लागेको छ। अवस्था सामान्य रहेकाले प्राथमिक स्वास्थ्य केन्द्र देउरामा उपचार जारी छ। चालक खप्तडछान्ना गाउँपालिका ५ का ३८ वर्षीय भेषराज उपाध्यायलाई मोटरसाइकलसहित प्रहरीले नियन्त्रणमा लिएको छ।