कार्यालय समय अगाडि बझाङ प्रशासनमा राष्ट्रिय गान
धनगढीः जिल्ला प्रशासन कार्यालय बझाङले बुधवारदेखि नयाँ सुरुवात गरेको छ। जिल्ला प्रशासन कार्यालयले कार्यालय समय अगाडि राष्ट्रिय गान गाउने कार्यको सुरुवात गरेको हो।
बझाङ प्रशासनले फागुन १७ गते बुधवारदेखि कार्यालय समय सुरु हुनुभन्दा पहिला राष्ट्रिय गान गाउने कार्यको सुरुवात गरेको छ। दैनिक कार्यालय समय अगाडि पोसाकसहित राष्ट्रिय गान गाएर मात्रै काम सुरु गर्ने कार्यको थालनी गरेको प्रमुख जिल्ला अधिकारी नारायण पाण्डेयले बताए। उनका अनुसार राष्ट्रिय गान गाएर कार्यालयको काम सुरु गर्दा समयमै कर्मचारी कार्यालयमा उपस्थिति हुने र राष्ट्रप्रतिको माया विश्वास बढ्ने छ।
प्रमुख जिल्ला अधिकारी पाण्डेले राष्ट्रिय गान पश्चात कार्यालयको सेवा प्रवाह तथा गतिविधिबारे कर्मचारीहरुलाई जानकारी गराउन पनि सहज हुने बताए। उनले सम्पूर्ण कर्मचारीलाई समयमै कार्यालयमा उपस्थित हुन निर्देशन समेत दिएको बताएका छन्।
