बैतडीमा जीवन बुडाल मृत्यु प्रकरणः ११ व्यक्तिमाथि अनुसन्धान

बैतडीः पिकनिक मनाउन बैतडीको दशरथचन्द नगरपालिका–६, शेरा गएका जीवन बुडालको शव आइतबार चौलानी नदीबाट निकालिएको छ।

दशरथचन्द नगरपालिका–१० खडेनीका २५ वर्षीय जीवन बुडाल राष्ट्रिय अनुसन्धान बझाङमा कार्यरत रहेको खुलेको छ। परिवारको रोहबरमा प्रहरीले लाइफ ज्याकेटको प्रयोग गरि बुडालको शव नदीबाट निकालिएको जिल्ला प्रहरी कार्यालय बैतडीका प्रमुख प्रहरी नायव उपरीक्षक प्रेमबहादुर शाहीले बताए।

शनिवार दिउँसो जीवन बुडालसहित १२ जना पिकनिक मनाउन चौलानी नदी किनारमा गएका थिए। ती मध्ये बुडाल राति चौलानी नदीमा मृत भेटिएको प्रहरीले बताएको छ।

मृतक शव निकालेर पोष्टमार्टमका लागि जिल्ला अस्पताल बैतडी पुगाइएको छ। शवको पोष्टमार्टपछि मात्रै मृत्युको कारण खुल्ने प्रहरी नायव उपरीक्षक शाहीले बताए। पिकनिकमा सहभागी ११ व्यक्तिमाथि प्रहरी अनुसन्धान समेत थालेको छ।