कैलालीको चुरेमा तेस्रो वडाध्यक्ष कप भलिबल प्रतियोगिता
धनगढी : कैलालीको चुरे गाउँपालिका– २ वसन्तपुरमा तेस्रो वडाध्यक्ष कप भलिबल प्रतियोगिताको उद्घाटन गरिएको छ ।
शनिबार एक औपचारिक कार्यक्रमको आयोजना गर्दै भलिबल प्रतियोगिताको उद्घाटन गरिएको हो । गाउँपालिकाको वडा नम्बर २ का अध्यक्ष तारासिंह साउदको प्रमुख आतिथ्यमा र सोही वडाकै सचिव जनकराज जोशीको विशिष्ट आतिथ्यमा प्रतियोगिताको उद्घाटन गरिएको जनाइएको छ ।
वसन्तपुर यूथ क्लवका सचिव योगेश साउदका अनुसार प्रतियोगिताका लागि ७ टिम दर्ता भएका छन् । विजेता टिमलाई ५ हजारको चेकसहित ट्रफि, मेडलका साथै प्रमाण पत्र प्रदान गरिने र प्रतियोगिताको यही कार्तिक २४ गते समापन गरिने उनले जानकारी दिए ।
त्यसैगरी द्वितीय र तृतीय हुने टीमलाई क्रमशः २५ हजार, १५ हजारको चेकसहित ट्रफि, मेडलका साथै प्रमाण पत्र प्रदान गरिने छ । कार्यक्रम समापनका दिन वडाध्यक्ष साउद र सचिव जोशीलाई खादा ओढाएर सम्मान समेत गरिने बताइएको छ ।
त्यस्तै देव बहादुर साउदको कृत्रिम खुट्टा खरिदका लागि सहयोग रकम संकलन अभियान अन्तर्गत गाउँपालिकाको तर्फबाट १० हजार र वसन्तपुर यूथ क्लवको तर्फबाट २५ हजार गरी ३५ हजार सहयोग रकम हस्तान्तरण गरिने यूथ क्लवका सचिव साउदले बताए ।
