डोटीको दिपायल विमानस्थलको स्तरोन्नति थप गरिएकोमा समयमा पनि नसकिने संकेत (अडियो रिर्पोट सहित)

डोटीको दिपायल विमानस्थलको पुर्ननिर्माण कार्य तोकिएको समयमा सम्पन्न हुन सकेको छैन । संगै काम सुरु गरिएको अछामको साफेबगर विमानस्थलको निर्माण कार्य सम्पन्न भएर परिक्षण उडान भईसक्दा समेत दिपायल विमानस्थलको निर्माण कार्य भने अझै अधुरो छ । २०५८ सालबाट वन्द भएको विमानस्थल पुनः सचालनका लागि काम सुरु भएको थियो तर दोश्रो पटक थप भएको समयमा पनि स्तरोन्नतिको कार्य भने नसकिने देखिएको छ । १५ महिनामा निर्माण कार्य सम्पन्न गर्नुपर्ने सम्झौता भएपनि असारसम्मका लागि ६ महिना थप हँुदा समेत दिपायल विमानस्थलको स्तरोन्नतिको कार्य पुरा हुन नसकेको हो । २०७३ साल कार्तिकमा काम सुरु गर्नुपर्ने भएपनि ढिलागरी फागुनबाट मात्रै काम सुरु गरिएको थियो । अहिलेसम्म विमानस्थल स्तरोन्नतिको ६० प्रतिशत काम भएको दावी गरिएको छ तर अहिले सम्म कालोपत्रे भने सुरु भएको छैन् । विमानस्थल निर्माण कार्यका ईन्जिनियर बालकृष्ण रेग्मीले निर्माण व्यवसायीले विभिन्न वहाना देखाउँदै काममा लापरबाही गरिरहेको बताए । करिब चार सय ९० मिटर लम्बाई भएको सो विमानस्थलको कालोपत्र गर्नका लागि झण्डै साढे ५ करोड बजेट विनियोजन गरिएको थियो ।

डेढ दशकदेखि ओझेलमा परेको विमानस्थल कालोपत्रे गर्ने योजना आएपछि डोटेली जनता खुसी भएका थिए तर निर्धारित समय सकिएर ६ महिनाको समय थप्दा पनि स्तरोन्नतिको कार्य सकिने छाँटकाँट नदेखिएको विमानस्थल रहेको दिपायल सिलगढी नगरपालिका वडा नम्बर २ का वडा अध्यक्ष राजेन्द्र खड्काले बताए ।  लामो समयदेखि गौचरणमा परिणत दिपायल विमानस्थल सञ्चालनमा आए प्रदेश नम्बर ७ का पहाडी जिल्लाको आर्थिक सम्वृद्धिसंगै पर्यटन प्रवद्र्धनमा टेवा पुग्ने अपेक्षा गरिएको छ । संगै काम सुरु गरिएको अछामको साफेबगर विमानस्थलमा परिक्षण उडान हुँदा समेत विमानस्थलको स्तरोन्नतिमा देखिएको लापरवाहीले डोटेली जनतालाई निराश बनाएको डोटी उद्योग बाणिज्य संघका अध्यक्ष नरेन्द्र खड्काले बताए । दिपायल विमानस्थलमा चार ९० मिटर लम्बाइको धावनमार्ग रहेकोमा एक हजार मिटर लम्वाईको धावन मार्ग बनाउने माग हुदै आएको छ । जग्गा अधिग्रहणको लागि सहमति भएपनि आगामी अर्थिक बर्षको लागि प्रदेश र संघीय सरकारले बजेट विनियोजन नगर्दा उक्त योजना अलपत्र पर्ने देखिएको छ । आफ्नै पहलमा विमानस्थलको काम सुरु भएको दावी गर्दै आएका प्रतिनिधि सभा सदस्य प्रेम आलेमगर पनि यस्मा मौन छन् । 

अडियो सुन्नुहोस्