बाजुरामा असिनापानीले अन्नबाली नष्ट
बाजुरा: असिनापानीले बाजुराको तल्लो भेगका तिन स्थानीय तहका अधिकांश गाउँमा लगाएको अन्नबाली चुटेर नष्ट पारेको छ। शनिबार साझ करिब एक घण्टाको समयसम्म परेको असिनापानीले पाक्न लागेको गहुँ, पाकिसकेको जौ र तरकारीलाई चुटेर नष्ट पारेको हो।
असिनाले बुढीगंगा नगरपालिका, त्रिवेणी नगरपालिका र खप्तड छेडेदह गाउँपालिकासहित अछाम जिल्लामा समेत अन्नबालीमा क्षति पुर्याएको छ। पानी र ठूला दानासहित परेको असिनाले तरकारी र जौ बालीमा लाखौको क्षति पुर्याएको बुढिगंगा– ९ का स्थानीय शिक्षक डम्बरबहादुर सिँहले बताए।
गहुँबाली उत्पादनका लागि भण्डारको रुपमा चिनिने बुढीगंगा र त्रिवेणी नगरपालिकामा पाक्न थालेका गहुँबालीमा असिनाले क्षति पुर्याएपछि किसान चिन्तित बनेका छन्। असिनाले बिउ उत्पादनका लागि लगाइएको गहुँमा समेत क्षति पुगेको स्थानीयले बताए।