कैलालीका ११ वनबाट काठ संकलन गरी मिलेमतोमा बिक्री गर्न खोज्दा अख्तियारको छापा

धनगढीः अख्तियार दुरुपयोग अनुसन्धान आयोग महेन्द्रनगर कार्यालयले मङ्गवार कैलालीको डिभिजन वन कार्यालय धनगढी र पहलमानपुरमा एकसाथ छापा हानेको छ। कैलालीका ११ सामुदायिक वनमा अनियमित र अवैध रूपमा हरिया साल र खयरका रुख काटेर लिलाम बिक्री गर्न खोजिएको भन्ने उजुरीका आधारमा दुवै डिभिजन वन कार्यालयमा छापा हानेको अख्तियार कञ्चनपुर कार्यालयका सूचना अधिकारी चेतराज भट्टले जानकारी दिए।

सूचना अधिकारी भट्टका अनुसार दुवै डिभिजन वन कार्यालयबाट आवश्यक कागजातसमेत नियन्त्रणमा लिएर अनुसन्धान अघि बढाइएको छ। उजुरीमा डिभिजन वन कार्यालय धनगढीअन्तर्गत रहेको बाह्रवन साझेदारी वन उपभोक्ता समितिको १ लाख ८६ हजार क्युफिट, केदारेश्वर सामुदायिक वन उपभोक्ता समितिको ३६ हजार क्युफिट गरेर जम्मा दुई लाख २२ हजार क्युफिट काठ बिक्री गर्न खोजिएको उल्लेख छ। उजुरीमा नियम विपरीत काठ कटान गरी मिलेमतोमा ठेक्ठा दिन खोजेको उल्लेख गरिएको भट्टले बताए।

अख्तियारका अनुसार डिभिजन वन कार्यालय पहलमानपुरअन्तर्गत छतिवन सामुदायिक वनको १८ हजार, मोहन्याल सामुदायिक वनको १२ हजार, जगतपुर सामुदायिक वनको ७ हजार, साडेपानी सामुदायिक वनको ७ हजार, मैनापोखरी सामुदयिक वन समूहको २३ हजार, शिवशक्ति सामुदायिक वन समूहको ८७ हजार, गतिशिल सामुदायिक वन समूहको १२ हजार, जनता सामुदायिक वन समूहको १८ हजार, घोडाघोडी सामुदायिक वन समूहको १९ हजार क्युफिट गरेर जम्मा १ लाख २३ हजार क्युफिट काठ बिक्री गर्न खोजिएको उजुरी परेको छ। कैलालीका ११ सामुदायिक वनबाट तीन लाख ४५ हजार क्युफिट काठ अवधै तरिकाले संकलन गरी बिक्री/वितरण गर्न अनुमति दिएको उजुरीपछि अख्तियारको टोलीले डिभिजन वन कार्यालय धनगढी र पहलमानपुरबाट आवश्यक कागजपत्र नियन्त्रणमा लिएर अनु्सन्धान थालेको हो।

यसअघि यी वनहरूबाट अवैध रुपमा काठ संकलन गरेको भन्दै संसदीय समितिमा उजुरी परेको थियो। उक्त उजुरीपछि संसदको अर्थ, विकास तथा प्राकृतिक स्रोत समितिले सबै वनहरुको स्थलगत अनुगमनपछि लिलामको प्रक्रिया अगाडि नबढाउन उद्योग, पर्यटन वन तथा वातावरण मन्त्रालयलाई गत असार ८ गते निर्देशन दिएको थियो।

संसदीय समितिले वार्षिक रूपमा २२ हजार क्युफिट काठ मात्रै कटान गर्न पाउने अनुमति रहेको बाह्रवनमा एकै वर्षमा एक लाख ८५ हजार क्युफिट काठ काटिएको तथ्य फेला पारेको थियो। बाह्रवनबाट साल, खयरलगायतका बहुमूल्य रुखहरू कटान गरिएको संसदीय छानबिन समितिले जनाइएको छ।

संसदीय समितिले नेकपाका संसदीय दलका नेता खगराज भट्टको संयोजकत्वमा छानविन समिति गठन गरेको थियो। उक्त समितिले पहलमानपुर डिभिजन वन कार्यालय अन्तर्गतका सामुदायिक वनहरूबाट काचो खयरको रुख संकलन गरिएको तथ्य फेला परेको सार्वजनिक गरेको थियो। संसदीय समितिले काठ लिलाम प्रक्रिया अगाडि नबढाउन निर्देशन दिए पनि प्रदेशको वन मन्त्रालयले लिलाम प्रक्रिया नरोकेपछि सरोकारवालाहरूले अख्तियार गुहार्नु परेको बताएका छन्।

अख्तियारले मङ्गलवार डिभिजन वन कार्यालय धनगढी र पहलमानपुरबाट कागजपत्र नियन्त्रणका लिएसँगै छानविन र अनुसन्धान अगाडि बढ्ने भएको हो।