निसर्ग हस्पिटल र सुदूरपश्चिम प्रदेश प्रहरीबीच स्वास्थ्य सेवामा २५ प्रतिशतसम्म छुट सम्झौता
धनगढीः धनगढीस्थित निसर्ग हस्पिटल एण्ड रिसर्च सेन्टर प्रालि र सुदूरपश्चिम प्रदेश प्रहरी कार्यालय बीच प्रहरी कर्मचारी तथा उनीहरूका परिवारलाई स्वास्थ्य सेवामा विशेष सहुलियत प्रदान गर्ने सम्बन्धी सम्झौता सम्पन्न भएको छ।
शनिबार भएको सम्झौताअनुसार सुदूरपश्चिम प्रदेशमा कार्यरत बहालवाला नेपाल प्रहरी कर्मचारी, अवकाश प्राप्त प्रहरी कर्मचारी, अमर तथा वीरगति प्राप्त प्रहरीका आश्रित परिवारले निसर्ग हस्पिटलमा उपचार गराउँदा विभिन्न स्वास्थ्य सेवामा २५ प्रतिशतसम्म छुट पाउने भएका छन्।
सम्झौतामा बहालवाला प्रहरी कर्मचारीका आमा, बुवा, श्रीमती तथा छोरा–छोरी, अवकाश प्राप्त प्रहरीका आश्रित परिवार तथा अमर एवं वीरगति प्राप्त प्रहरीका आश्रित परिवारलाई लक्षित गरी स्वास्थ्य सेवा सहुलियत उपलब्ध गराइने उल्लेख छ।
सम्झौताअनुसार ओपीडी सेवा, एक्स–रे, यूएसजी, सिटी स्क्यान, ईसीजी, इको, टीएमटी, एबीपी, होल्टर, प्रयोगशाला सेवा, फिजियोथेरापी, शल्यक्रिया सेवा, बेड तथा भेन्टिलेटर सेवामा २५ प्रतिशतसम्म छुट प्रदान गरिनेछ। यस्तै औषधि खरिदमा ७ प्रतिशतसम्म छुटको व्यवस्था गरिएको छ।
सहुलियत सुविधा लिन सेवाग्राहीले सुदूरपश्चिम प्रदेश प्रहरी कार्यालयको सिफारिस पत्र वा आफ्नो परिचय खुल्ने आधिकारिक परिचयपत्र पेश गर्नुपर्ने व्यवस्था गरिएको छ।
सम्झौतापत्रमा निसर्ग हस्पिटलका अध्यक्ष तिर्थराज पन्त र सुदूरपश्चिम प्रदेश प्रहरी कार्यालयका प्रमुख प्रहरी नायव महानिरीक्षक ओमबहादुर रानाले हस्ताक्षर गरेका छन्। सम्झौताका साक्षीका रूपमा निसर्ग हस्पिटलका मेडिकल डाइरेक्टर डा. मेराज आलम अन्सारी र प्रदेश प्रहरी कार्यालयका प्रहरी निरीक्षक महेश विक्रम शाही रहेका छन् भने प्रहरी वरिष्ठ उपरीक्षक पदमबहादुर बिष्टले रहोबरमा हस्ताक्षर गरेका छन्।
दुवै पक्षबीच भएको सम्झौता प्रत्येक आर्थिक वर्षमा नवीकरण गरिने र आवश्यकताअनुसार आपसी सहमतिमा संशोधन गर्न सकिने जनाइएको छ। निसर्ग हस्पिटलले उक्त सम्झौताले राष्ट्रसेवामा समर्पित प्रहरी कर्मचारी तथा उनीहरूका परिवारलाई गुणस्तरीय स्वास्थ्य सेवामा सहज पहुँच सुनिश्चित गर्न सहयोग पुग्ने विश्वास व्यक्त गरेको छ।
सम्झौतापछि डीआईजी रानाले निसर्ग हस्पिटललाई धन्यवाद दिँदै यो सम्झौताले प्रहरी कर्मचारी तथा उनीहरूका परिवारलाई ठूलो राहत पुग्ने विश्वास व्यक्त गरेका छन्।
