मनसुनका कारण सुदूरपश्चिममा ३३ हजारभन्दा बढी नागरिक प्रभावित हुने अनुमान
धनगढीः यस वर्षको मनसुनका कारण सुदूरपश्चिम प्रदेशमा ३३ हजारभन्दा बढी नागरिक प्रभावित हुने अनुमान गरिएको छ। आन्तरिक मामिला तथा कानुन मन्त्रालय, सुदूरपश्चिमका अनुसार बाढी, पहिरो र डुबानजस्ता विपद्बाट प्रदेशका ७ हजार ६ सय ३ घरधुरी प्रत्यक्ष प्रभावित हुनसक्ने आँकलन गरिएको हो।
मन्त्रालयका विपद् सम्पर्क व्यक्ति जनक धामीका अनुसार करिब ३३ हजार २ सय २७ जना नागरिक विपद्को जोखिममा छन्। प्रदेश सरकार र सरोकारवाला निकायहरूले सम्भावित क्षति न्यूनीकरणका लागि पूर्वतयारी र प्रतिकार्य योजना तीव्र बनाएका छन्। प्रभावित हुने स्थान र घरधुरीको पहिचान गरिसकिएको र छिट्टै कार्यविधि बनाएर जिम्मेवारी बाँडफाँट गरिने धामीले बताए।
भौगोलिक अवस्थाका कारण सुदूरपश्चिमका जिल्लामा विपद्को स्वरूप फरक–फरक रहने देखिएको छ। यस वर्ष तराईका कैलाली र कञ्चनपुर मनसुनबाट सबैभन्दा बढी प्रभावित हुने अनुमान गरिएको छ, जहाँ नदी कटान, डुबान र बाढी मुख्य चुनौती रहनेछ।
पहाडी तथा हिमाली भू–भागमा डुबानको जोखिम कम भए पनि पहिरोको सम्भावना उच्च रहेको मन्त्रालयको निष्कर्ष छ। विगतमा जथाभाबी सडक निर्माण र कमजोर भू–बनोटका कारण सामान्य वर्षामा समेत ठूला पहिरो जाने गरेको अनुभवका आधारमा यस वर्ष पनि पहाडी जिल्लामा उच्च सतर्कता अपनाउनुपर्ने धामीले बताए।
मन्त्रालयको तथ्यांकअनुसार कञ्चनपुरमा ७ हजार १ सय ३२, कैलालीमा ६ हजार १ सय ९५, डोटीमा ४ हजार ८ सय २०, बाजुरामा ३ हजार ७ सय ७६, बैतडीमा ३ हजार ३ सय ६२, डडेल्धुरामा ३ हजार १ सय ८, बझाङमा १ हजार ७ सय ७४, अछाममा १ हजार ६ सय २ र दार्चुलामा १ हजार ४ सय ६७ जना प्रभावित हुने अनुमान गरिएको छ।
मनसुन सुरु हुन लागेकाले नागरिकको जीउधन जोगाउन मन्त्रालयले विशेष कार्यदल गठन गरी सम्भावित विपद् व्यवस्थापन र प्रतिकार्यका लागि विस्तृत मस्यौदा तयार गरिसकेको छ। मनसुन सक्रिय हुनु अगावै उक्त मस्यौदालाई मन्त्रिपरिषद्बाट पारित गरी पूर्ण रूपमा कार्यान्वयनमा लैजाने तयारी भइरहेको मन्त्रालयले जनाएको छ।
