कञ्चनपुर इँटा उद्योगमा ट्र्याक्टर दुर्घटना: २ जनाको मृत्यु, १ घाइते
कञ्चनपुर: कञ्चनपुरको पुनर्वास नगरपालिका–७ स्थित एक इँटा उद्योगमा ट्र्याक्टर दुर्घटना हुँदा दुई जनाको मृत्यु भएको छ भने एक जना घाइते भएका छन्।
२०८३ वैशाख २० गते राति करिब ११ बजे कृष्ण बहादुर तामाङले सञ्चालन गरेको न्यु जनता इँटा उद्योगमा काम गर्ने मजदुरहरू काँचो इँटाको चट्टामाथि सुतिरहेका बेला पानी छर्किने क्रममा ट्र्याक्टर अनियन्त्रित भई उनीहरूमाथि ठोक्किएको प्रहरीले जनाएको छ।
दुर्घटनामा भारत उत्तर प्रदेश बहराइज जिल्ला निवासी २७ वर्षीय अजय कुमार र ९ वर्षीय पवन कुमार गम्भीर घाइते भएका थिए। उपचारका क्रममा अजय कुमारको सेती प्रादेशिक अस्पताल र पवन कुमारको नवजीवन अस्पतालमा मृत्यु भएको हो। दुवैको शव सेती प्रादेशिक अस्पतालको शवगृहमा राखिएको छ।
यस्तै, ११ वर्षीय घुर्रा कुमार मध्यम घाइते भएका छन् र उनको सेती प्रादेशिक अस्पतालमा उपचार भइरहेको छ।
घटनापछि इलाका प्रहरी कार्यालय त्रिभुवनबस्तीबाट खटिएको टोलीले ट्र्याक्टर र पानी छर्किने ट्याङ्कर नियन्त्रणमा लिएको छ। दुर्घटनामा संलग्न चालक भने फरार रहेको र खोजी कार्य जारी रहेको प्रहरीले जनाएको छ।
