सुहाङ नेम्वाङले एमाले संसदीय दलको नेतामा दाबी पेश
काठमाडौँः नेकपा एमालेका युवा सांसद सुहाङ नेम्वाङले संसदीय दलको नेतामा औपचारिक रूपमा आफ्नो दाबी प्रस्तुत गरेका छन्।
च्यासलमा जारी संसदीय दलको बैठकमा नेम्वाङले पार्टीको वर्तमान जनभावना र आवश्यकतालाई ध्यानमा राख्दै नेतृत्व लिन इच्छा व्यक्त गरेका हुन्। बैठकमा सहभागी एक नेताका अनुसार उनले पार्टीको विधि, पद्धति र अग्रजहरूको भूमिकालाई सम्मान गर्दै जिम्मेवारी सम्हाल्न तयार रहेको बताएका छन्।
नेम्वाङले देशको वर्तमान परिस्थिति र सदन भित्र तथा बाहिरको अवस्थालाई बेवास्ता गर्न नहुने उल्लेख गर्दै आफ्नो धारणा स्पष्ट पारे। साथै, उनले आफ्नो प्रस्तुति अग्रजहरूको विकल्पका रूपमा नभई उनीहरूको अनुभव र आशीर्वादसँगै युवाको ऊर्जा जोड्ने प्रयास भएको बताएका छन्।
उनले पार्टीले अंगालेको प्रतिस्पर्धात्मक प्रणाली र लोकतान्त्रिक अभ्यासलाई आत्मसात् गर्नुपर्ने विषयमा नेतृत्वलाई स्मरण गराएका छन्।
बादलको अध्यक्षतामा जारी बैठकमा विष्णु पौडेल, पृथ्वीसुब्बा गुरुङ र शंकर पोखरेल लगायतका शीर्ष नेताहरू सहभागी छन्।
