पत्रकार महासङ्घ स्थापना दिवसमा तनहुँका ६ पत्रकार सम्मानित
दमौली (तनहुँ): नेपाल पत्रकार महासङ्घको ७१औँ स्थापना दिवसका अवसरमा तनहुँमा ६ जना पत्रकार पुरस्कृत भएका छन्। नेपाल पत्रकार महासङ्घ तनहुँ शाखाले दमौलीमा आयोजना गरेको कार्यक्रममा उनीहरूलाई सम्मान गरिएको हो।
रणबहादुर गुरुङद्वारा स्थापित सुरज गुरुङ स्मृति पत्रकारिता पुरस्कारबाट उज्वल पौडेल, मुक्तिनाथ खनालद्वारा स्थापित भवानी खनाल स्मृति पत्रकारिता पुरस्कारबाट नारायण खड्का, प्रदीप काफ्लेद्वारा स्थापित पुरुषोत्तम काफ्ले स्मृति पत्रकारिता पुरस्कारबाट श्रीहरि पौडेल, उत्तम र सुमन भट्टराईद्वारा स्थापित हरिभक्त भट्टराई स्मृति पत्रकारिता पुरस्कारबाट राजकुमार श्रेष्ठ (विवि), वरिष्ठ अधिवक्ता कमलामोहन वाग्लेद्वारा स्थापित चिरञ्जीवी हरिमाया स्मृति पत्रकारिता पुरस्कारबाट मिला दरै तथा भाग्यशाली ढुङ्गानाद्वारा स्थापित टीकानिधि ढुङ्गाना स्मृति व्यास–पराशर पत्रकारिता पुरस्कारबाट ओमकार आचार्यलाई पुरस्कृत गरिएको छ।
महासङ्घले न्याय, सहकारी, धार्मिक, सांस्कृतिक तथा पर्यटनलगायतका क्षेत्रमा योगदान पुर्याउने पत्रकारलाई हरेक वर्ष सम्मान गर्दै आएको छ। सुरज गुरुङ पत्रकारिता पुरस्कारको राशि रु पाँच हजार रहेको छ भने अन्य पुरस्कारको राशि जनही रु १० हजार रहेको छ।
कार्यक्रममा व्यास नगरपालिकाका प्रमुख वैकुण्ठ न्यौपाने, प्रमुख जिल्ला अधिकारी शिवलाल तिवारी तथा शाखाका अध्यक्ष डिपी अधिकारीलगायतले पुरस्कार प्रदान गरेका थिए।
