कञ्चनपुरमा बैँकले लिलाम गरेको घर विप्लव माओवादीको कब्जामा

कञ्चनपुर: कञ्चनपुरको शुक्लाफाँटा नगरपालिका–१० का अजय विकको घर, जसलाई एनएमबी बैँकले लिलाम गरेको थियो, नेत्रविक्रम चन्द विप्लव नेतृत्वको नेपाल कम्युनिस्ट पार्टीले कब्जामा लिएको छ।

बैँकले झलारी बजारमा पाँच धुरमा फैलिएको साढे तीन तलाको घर लिलाम गरेको थियो। पार्टीले उक्त घरमा आफ्नै झन्डा र कार्यालय राख्दै पूर्णरूपमा नियन्त्रणमा लिएको जानकारी दिएको छ।

नेपाल कम्युनिस्ट पार्टी कञ्चनपुरका न्याय विभाग प्रमुख रमन सीले बताए अनुसार, बैँकले विक परिवारलाई जानकारी नदिई घर लिलाम गरेको र परिवारलाई मानसिक पीडा दिएको भन्दै पार्टीले घर कब्जामा लिएको हो। पार्टीका केन्द्रिय सदस्य ललितजङ्ग सीले भने, “धितो लिलाम गर्दा बैँक र दलाल मिलेर विक परिवारलाई समस्यामा पारेको कारण घर कब्जा गरिएको हो।”

एनएमबी बैँकले विकले २०७५ मा लिएको ऋणको ब्याज तिर्न ढिलाइ गरेको भन्दै २०८० चैतमा दुई करोड मूल्य बराबरको घर लिलाम गरेको थियो। यस विषयमा बैँकले जालसाजी गरेको आरोपमा जिल्ला प्रहरी कार्यालय कञ्चनपुरमा तीन जनाविरुद्ध उजुरी परेको छ। उजुरीमा लिलामी घर खरीदकर्ता धिरेन्द्र साउँद र उनकी पत्नी तुलसीकुमारी डाँगा, साथै वडा १० का वडासचिव जुनाकुमारी शेरालाई समावेश गरिएको छ।

अजय विकका अनुसार, १५ वर्षको कर्जा अवधिको ‘होमलोन’ अन्तर्गत २९ लाख ५० हजार ऋण लिएकोमा बैँकले लिलामीको सूचना पाएपछि ३ लाख नगद र १ लाखको चेक बुझाउन गए पनि रकम नपाएको बताए।

बैँकका झलारी शाखाका कर्मचारीले भने सबै कागजात केन्द्रिय कार्यालयमा पठाइएको हुँदा शाखामा उनीहरूलाई जानकारी नभएको बताइरहेका छन्। यसैबीच, स्थानीय जेनजी युवा सङ्घर्ष समितिले बैँकको झलारी शाखामा तालाबन्दी गरेको छ।