३ महिनामा कैलालीमा मात्रै सय भन्दा बढी सवारी साधन दुर्घटना

धनगढीः कैलालीमा सवारी साधन दुर्घटनाको दर पछिल्ला महिनाहरूमा भयावह रूपमा बढेको देखिएको छ। जिल्ला ट्राफिक प्रहरी कार्यालय कैलालीका अनुसार चालु आर्थिक वर्षको साउनदेखि कात्तिक १७ गतेसम्म मात्र १ सय ४ वटा सवारी साधन दुर्घटना भएका छन्।

ती दुर्घटनामा परि १८ जनाले ज्यान गुमाएका छन् भने २ सय १५ जना घाइते भएका छन्। ट्राफिक प्रहरी प्रमुख चक्र बहादुर देउवाका अनुसार साउन महिनामा ३३ वटा सवारी दुर्घटनामा २ जनाको मृत्यु भएको र ६५ जना घाइते भएका थिए। भदौ महिनामा १७ वटा दुर्घटना हुँदा १ जनाको ज्यान गएको र ३१ जना घाइते भएको विवरण छ।

यस्तै, असोज महिनामा दुर्घटनाको संख्या बढ्दै २९ पुगेको र तीमध्ये ७ जनाले ज्यान गुमाएका छन् भने ७० जना घाइते भएका छन्। हालैको कात्तिक १७ गतेसम्मको अवधिमा मात्र २५ वटा सवारी साधन दुर्घटनामा ८ जनाको मृत्यु र ४९ जना घाइते भएका छन्। प्रमुख देउवाका अनुसार अधिकांश दुर्घटनाका कारण सवारी चालकले गति सीमा उल्लङ्घन गर्नु, लेन अनुशासन नपालनु, र मापसे गरेर सवारी चलाउनु रहेको छ। उनका अनुसार ट्राफिक प्रहरीले पछिल्ला दिनहरूमा सडक सुरक्षा अभियान सशक्त रूपमा सञ्चालन गरिरहेको छ।

उनले सवारी चालक र यात्रुहरूलाई सर्तक रहन आग्रह गर्दै सवारी चलाउँदा गति नियन्त्रण र ट्राफिक नियमको पालना अनिवार्य गर्नुपर्ने बताए। कैलालीमा बढ्दो दुर्घटनाले सडक सुरक्षाप्रति गम्भीर ध्यान दिनुपर्ने आवश्यकता देखिएको उनको भनाई छ।