नेपाल चेम्बर सुदूरपश्चिमले सुपलाई सूचना प्रविधिको केन्द्र बनाउने

धनगढीः सुदूरपश्चिम प्रदेशलाई नेपालको अर्को सूचना प्रविधि केन्द्रका रूपमा विकास गर्ने उद्देश्यका साथ नेपाल चेम्बर अफ कमर्स सुदूरपश्चिम र टेकपाइला इनोभेसन्सले संयुक्त रूपमा सुदूरपश्चिम सूचना प्रविधि केन्द्र अभियान सुरु गरेका छन्।

यो अभियानले शिक्षा, रोजगारी र प्रविधि–आधारित विकास मार्फत सम्पूर्ण सुदूरपश्चिमलाई डिजिटल रूपान्तरण तर्फ अघि बढाउने लक्ष्य राखेको छ। युवाहरूको प्रविधिप्रतिको बढ्दो चासोलाई ध्यानमा राख्दै यस अभियान अन्तर्गत कम्प्युटर प्रोग्रामिङ, कृत्रिम बुद्धिमत्ता, साइबर सुरक्षा, मेघ गणना लगायतका विषयमा अन्तर्राष्ट्रिय स्तरका रोजगारीमुखी कार्यक्रमहरू सञ्चालन गरिँदैछन्।

टेकपाइला इनोभेसन्सले डिजी समूहसँग सहकार्य गर्दै सुदूरपश्चिमका दुई सयभन्दा बढी विद्यालय र कलेजहरूसँग साझेदारी गरेको छ। यी संस्थाहरूमार्फत युनाइटेड किङडमको प्रतिष्ठित संस्थाद्वारा मान्यता प्राप्त नवीनतम सूचना प्रविधि पाठ्यक्रम लागू गरिँदैछ।

घरमै बसेर रोजगारीको अवसर
कार्यक्रममार्फत नेपाली युवाहरूले मेघ प्रविधिमा आधारित भर्चुअल रोजगारीका अवसरहरू प्राप्त गर्न सक्नेछन्, जसले उनीहरूलाई उच्च तलबका अन्तर्राष्ट्रिय प्रविधि सम्बन्धी कामहरू घरमै बसेर गर्न सक्षम बनाउनेछ।

नेपाल चेम्बर अफ कमर्स सुदूरपश्चिमका अध्यक्ष विनोद मल्लले भने, 'यो केवल शिक्षाको कार्यक्रम होइन, यो आर्थिक रूपान्तरणको अभियान हो। जब हाम्रो युवा पीढी विश्वस्तरका प्रविधि सिप सिकेर घरमै बसेर काम गर्न सक्षम हुन्छ, देशमा रेमिट्यान्स बढ्छ, सूचना प्रविधि रोजगारी विस्तार हुन्छ, र युवा देशमै बस्न सक्छन्।'

यो परियोजना डिजिटल नेपाल अभियानसँग प्रत्यक्ष रूपमा सम्बन्धित छ र सुदूरपश्चिमलाई रोजगारीमुखी र प्रविधिमैत्री प्रदेशका रूपमा स्थापित गर्ने लक्ष्य लिएको छ। साथै, स्थानीय प्रतिभा र प्रविधि–आधारित उद्यमशीलता लाई प्रोत्साहन दिँदै टिकाउ आर्थिक विकासतर्फ प्रदेशलाई अघि बढाउने प्रयास गरिएको छ।

त्यसैगरी, 'पढौँ र कमाऔँ” कार्यक्रम मार्फत विद्यार्थीहरूले अध्ययनसँगै आम्दानी गर्न सक्ने अवसर पाउने छन्, जसले शिक्षा र रोजगारीबीचको अन्तर घटाउने वातावरण सिर्जना गर्नेछ।

कार्यक्रममा नेपाँल चेम्बर अफ कमर्सका निवर्तमान अध्यक्ष राजेन्द्र मल्ल, सूचना प्रविधि सभापति विज्ञान श्रेष्ठ, र विभिन्न विद्यालय तथा कलेजका प्रतिनिधिको सहभागिता रहेको थियो।

कार्यक्रममा धनगढीको बाल्मिकी अन्तर्राष्ट्रिय विद्यालय, ऐश्वर्या विद्या निकेतन, कैलाली मोडल विद्यालय, कैलाली बहुमुखी क्याम्पस, सुदूरपश्चिम एकेडेमी, आरएनबीएस कलेज, साथै अत्तरियाको दुर्गा लक्ष्मी नमूना विद्यालय, सत्यवती एकेडेमी, जनकल्याण माध्यमिक विद्यालय, फार्वेष्ट चिकित्सा विद्यालय, न्यू सरस्वती विद्या मन्दिर, होली फेमिली, आदर्श विद्या निकेतन लगायतका संस्थाहरूको सक्रिय सहभागिता रहेको थियो।

यो अभियानले सुदूरपश्चिमलाई डिजिटल नेपालको अग्रणी प्रदेश बनाउने दीर्घकालीन दृष्टिकोण बोकेको छ।