दुई महिना अगाडि लुटिएको सुप विश्वविद्यालयका डिनको गाडी अझै फेला परेन

धनगढी: सुदूरपश्चिम विश्वविद्यालय स्वास्थ्य विज्ञान संकायका डिन डाक्टर हेमनाथ जोशीले प्रयोग गर्ने गाडी लुटिएको दुई महिना पूरा हुन लागेको छ। गत भदौ २५ गते डिन जोशीको निवासबाट लुटिएको गाडी अहिलेसम्म फेला परेको छैन। डिन जोशीले चढ्ने  बा २ झ २८५९ नम्बरको सेतो स्कारपियो गाडी दिउँसै लुटिएको हो।

जेन्जी आन्दोलनको भोलिपल्ट भदौ २५ गते डाक्टर जोशीको निजी निवास धनगढी उपमहानगरपालिका–५, हसनपुरबाट मुखमा मास्क लगाएका आठजनाको समूहले दिउँसो १२ बजे गाडी लुटेर लगेका थिए। घटना लगत्तै कैलाली प्रहरी, सशस्त्र प्रहरी र नेपाली सेनालाई खबर गरिए पनि लुटिएको गाडी दुई महिनासम्म फेला नपरेको विश्वविद्यालयले जनाएको छ।

विश्वविद्यालयले घटना लगत्तै मौखिक जानकारी दिएर केही व्यक्तिको पहिचानसहित उजुरीसमेत दर्ता भएको जनाएको छ। घटनामा संलग्न व्यक्तिको पहिचान दिएर उजुरी दर्ता गर्दासमेत कैलाली प्रहरीले अहिलेसम्म गाडी लुटपाटमा संलग्नबारे कुनै क्लुसम्म भेट्टाएको छैन। जिल्ला प्रहरी कार्यालय कैलालीका प्रवक्ता प्रहरी नायब उपरीक्षक राजकुमार सिंहले घटनामा संलग्न व्यक्ति र गाडी फेला नपरेको बताएका छन्। उनले गाडीबारे कुनै तथ्य फेला पार्न नसकिएको बताएका छन्।

प्रदेश सभा सदस्यले चढ्ने गाडी भने फिर्ता
जेन्जी आन्दोलनकै दिन प्रदेश सभा सदस्यले प्रयोग गर्ने दुई वटा गाडी आन्दोलनकारीले नियन्त्रणका लिएका थिए।

नेपाली कम्युनिष्ट पार्टीका संसदीय दलका उप-नेता अक्कल बहादुर रावल र गीतादेवी मालले प्रयोग गर्ने सरकारी गाडी आन्दोलनकारीले लगेका थिए। भदौ २४ गते बिहान सात बजे निवासमै आएर आन्दोलनकारीहरूले आफूले प्रयोग गर्ने गाडी लगेको प्रदेश सभा सदस्य रावले बताए। 'भदौ २४ गते बिहान ७ बजेको समयमा मैले प्रयोग गर्ने गाडी आन्दोलनकारीले घरमै आएर लगेका थिए। दिनभर चलाएर राति ११ बजे मात्रै फिर्ता गरे,' उनले भने, 'त्यसपछि राति १२ बजे उक्त गाडी प्रहरीको समन्वयमा सशस्त्र प्रहरीको गणमा बुझाएको थिए।' अन्दोलनकारीले गाडीमा सामान्य क्षति पुगाएर गाडी फिर्ता गरेको रावलले बताएका छन्।

जेन्जी आन्दोलनकै दिन माओवादी दलको प्रमुख सचेत गीतादेवी मालले प्रयोग गर्ने गाडीसमेत आन्दोलनकारीले लगेको सांसद रावलले बताए। मालले चढ्ने गाडी भने प्रहरीले फेला पारेको हो। प्रहरीले बेवारिसे अवस्थामा उक्त गाडी फेला पारेको थियो। सुरूमा सोही गाडी सुदूरपश्चिम विश्वविद्यालयका डिन जोशीले प्रयोग गर्ने अनुमान प्रहरी गरेको थियो। विश्वविद्यालयका अधिकारी आएर चेकजाँच गर्दा उक्त गाडी डिन जोशीबाट लुटिएको नभएको थाहा भएको थियो। त्यसपछि भने दिउँसै लुटिएको विश्वविद्यालयको गाडीको बारेमा प्रहरीले कुनै तथ्य र सूचना संकलन गर्न सकेको छैन।

भदौ २५ गते धनगढीको जनजीवन सामान्य थियो। सामान्य अवस्थामा दिउँसोको समयमा लुटिएको गाडीबारे सूचना पाएर पनि प्रहरीले कुनै तथ्य फेला पार्न सकेन।  गाडी लुट्ने समूहको पहिचानसमेत भएको छैन।

कैलाली प्रहरीले उक्त घटना “योजनाबद्ध र असामान्य प्रकृतिको” भएको बताएको छ। गाडी लुट्ने समूहको अहिलेसम्म पहिचान खुल्न सकेको छैन भने गाडी पनि फेला नपरेको प्रहरीले बताएको छ।