जानकी, बर्दगोरिया र धनगढीमा सवारी दुर्घटना, एक जनाको मृत्यु
धनगढीः कैलालीका तीन पालिकामा सवारी दुर्घटना भएका छन्।
जिल्लाको जानकारी गाउँपालिका, बर्दगोरिया र धनगढी उपमहानगर क्षेत्रमा सवारी दुर्घटना भएको हो। जानकी गाउँपालिका–२ खैरेनी टोलमा मोटरसाइकल अनियन्त्रित भएर पल्टिदा ३७ वर्षीय एक पुरुष घाइते भएका छन्। घाइते पुरुषको नवजीवन अस्पताल धनगढीमा उपचारको क्रममा मृत्यु भएको छ।
सुदूरपश्चिम प्रदेश ०१–००८ प ६८९८ नम्बरको मोटरसाइकल अनियन्त्रित भएर पल्टिदा घाइते भएका मोटरसाइकल चालक भजनी नगरपालिका–८ बहादुरपुरका ३७ वर्षीय राजकुमार चौधरीको मृत्यु भएको प्रहरीले जनाएको छ। यस्तै बर्दगोरिया गाउँपालिका–२ मा मोटरसाइकलले विपरीत दिशाबाट आउँदै गरेको साइकलयात्रीलाई ठक्कर दिँदा २६ र ६५ वर्षीय २ पुरुष घाइते भएका छन्।
घाइते दुबै जनाको बर्दगोरियास्थित बर्दगोरिया अस्पताल बौनियामा उपचार भइरहेको छ। यता धनगढीमा पनि सवारी दुर्घटना भएको छ। धनगढी उपमहानगरपालिका–३ बोराडाँडीमा मोटरसाइकलले पैदलयात्रीलाई ठक्कर दिँदा १८, १९ र २० वर्षीय तीन जना घाइते भएका छन्। घाइतेको पदमा अस्पताल अत्तरियामा उपचार भइरहेको छ।
