कञ्चनपुरबाट १८ लाखको भन्सार छलीका सामान बरामद, २ जना पक्राउ
कञ्चनपुरः कञ्चनपुरको विभिन्न स्थानबाट १८ लाख बढीको भन्सार छलीका सामान बरामद गरिएको छ।
कञ्चनपुरको भीमदत्त नगरपालिका–४ महेन्द्रनगर बजारको कबडहल जाने बाटोमा सुदूरपश्चिम प्रदेश ०१–००१ ख २६११ नम्बरको मिनिटाटालाई चेकजाँच गर्दा अबैंध रुपमा भारतबाट भन्सार छली गरि ल्याएका अन्दाजी १० लाख ४ हजार ४ सय मूल्यको सामानसहित गाडी चालक बैतडीको दशरथचन्द नगरपालिका–२ बस्ने २८ वर्षीय दिपक सिंह भाट र गाडी साहु कञ्चनपुरको भीमदत्त नगरपालिका–४ बस्ने २४ वर्षीय सम्भु भट्टलाई पक्राउ गरिएको जिल्ला प्रहरी कार्यालय कञ्चनपुरले जनाएको छ।
भन्सार छलीको चक्लेट, सुदर्शन सुपारी, सुर्ती, नरिवल, दाल, चिनि, गाडी र पक्राउ परेका दुबै जनालाई नियन्त्रणमा लिई आवश्यक कार्बाहीको लागि भन्सार कार्यालय गड्डाचौकी पठाएको प्रहरीले जनाएको छ। यस्तै भीमदत्त नगरपालिका–४ बसपार्क, भीमदत्त नगरपालिका–६ ऐठपुर, भीमदत्त नगरपालिका–१० गड्डाचौकी र भीमदत्त नगरपालिका–११ चौकीसत्ताबाट अबैंध रुपमा भारतबाट भन्सार छली गरि ल्याएका अन्दाजी ८ लाख ६५ हजार ६८० मूल्य बराबरको सामान बरामद गरिएको छ।
उक्त मुल्य बराबरको चिनि, मिश्री, सुट कपडा, जुत्ता, चप्पल, कपडा, हाडबेयर, मोबईलका सामान, किराना लगायतका सामानहरु जिल्ला प्रहरी कार्यालय कञ्चनपुरबाट खटिएको प्रहरी गस्ती टोलीले बेबारिसे अवस्थामा फेला पारी नियन्त्रणमा लिएको हो।
