माओवादी अध्यक्षसहितको जम्बो टोली धनगढी आइपुग्यो
धनगढीः नेकपा माओवादी केन्द्रका अध्यक्षसहितको जम्बो टोली धनगढी आइपुगेको छ।
माओवादी केन्द्रको सुदूरपश्चिम प्रदेशमा कार्यरत केन्द्रीय सदस्य र प्रदेश पदाधिकारीको संयुक्त परामर्श समिति बैठकमा सहभागि हुने अध्यक्षसहितको जम्बो टोली धनगढी आइपुगेको हो। आज (बुधबार) धनगढीको स्वास्थ्य तालिम केन्द्रमा परामर्श समितिको बैठक शुरु भएको छ। परामर्श बैठकमा भाग लिन पार्टी अध्यक्ष पुष्पकमल दाहाल (प्रचण्ड)सहित शीर्ष नेताहरू धनगढी पुगेका छन्।
दाहालसहित बैठकमा पार्टीका वरिष्ठ उपाध्यक्ष नारायणकाजी श्रेष्ठ, उपाध्यक्षद्धय अग्नि सापकोटा र पम्पा भुषाल, महासचिव देव गुरुङ, उपमहासचिव गिरीराजमणी पोखरेल, जनाद्र्धन शर्मा, वर्षमान पुन, शक्ति बस्नेत, हरिबोल गजुरेललगायत नेताहरु सहभागी छन्।
साउन ३१ गते सम्पन्न पार्टीको स्थायी समिति बैठकले केन्द्रीय समितिको पूर्ण बैठकको तयारीको सन्दर्भमा केन्द्रीय सदस्य र प्रदेश पदाधिकारीबिचमा छलफलका लागि परामर्श बैठक बस्ने निर्णय गरेअनुसार बैठक बसेको हो। बैठकमा स्थायी समितिको निर्णय र परिपत्रसहितका प्रस्तावमाथि छलफल हुनेछ।
