बझाङमा हिमपहिरोमा एक महिलाको मृत्यु, २ बेपत्ता, २ जना घाइते
धनगढीः बझाङमा हिमपहिरोमा परेर बेपत्ता भएका मध्ये एक जनाको शव भेटिएको छ।
सुर्मा गाउँपालिका–३ कि रामकोइलादेवी बोहराको शव भेटिएको जिल्ला प्रहरी कार्यालयका प्रमुख प्रहरी नायब उपरीक्षक(डीएसपी) जागेश्वर भण्डारीले बताए। डीएसपी भण्डारीका अनुसार घटनास्थलतर्फ हिडेको प्रहरी र सशस्त्र प्रहरीको संयुक्त टोली त्यहाँ नपुगेपनि स्थानीयहरुले बोहराको शव भेटिएको जानकारी प्रहरीलाई गराएका छन्।
हिमपहिरोमा परेर बेपत्ता भएका अन्य दुई जनाको अवस्था भने अज्ञात रहेको डीएसपी भण्डारीले बताए। उनकाअनुसार पहिरोमा परेर दुई जना घाइते भएका छन्। उनीहरुको परिचय खुल्न सकेको छैन। आइतबार बिहान सुर्मा गाउँपालिका–२ को धानशेरा भन्ने ठाउँमा हिमपहिरो गएको थियो। आइतबार यार्सागुम्का संकलनका लागि गएका ५ जना हिमपहिरोमा परेर बेपत्ता भएका थिए।
पहिरोको खबर पाएपछि प्रहरी टोली घटनास्थलतर्फ गएको छ, तर पैदल जानुपर्ने भएकाले त्यहाँ पुग्न समय लाग्ने बताइएको छ।
