कैलाली उद्योग वाणिज्य संघको निर्वाचनको मिति तोकियो
पुस १३ गतेदेखि निर्वाचन कार्य तालिका सुरु भएर पुस २८ गते मतदान
कैलाली उद्योग वाणिज्य संघको सदस्यहरुको टुङगो लागेपछि नयाँ नेतृत्व चयनका लागि निर्वाचनको मिति तोकिएको छ । सदस्यता छानविनको काम सकिएपछि निर्वाचनको प्रक्रिया अगाडी वढाउन कार्य तालिका बनाईएको हो । जिल्ला प्रशासन कार्यालय कैलालीका प्रशासकीय अधिकृत यादव भण्डारीको संयोजकत्वमा रहेको निर्वाचन समितीले सरोकारवालासँगको छलफलपछि निर्वाचनको मिति र कार्य तालिका तय गरेको हो । पुस १३ गतेदेखि सुरु हुने कार्यतालिका पुस २८ गते मतदान हुने गरी बनाईएको छ । पुस १३ मा नामावली प्रकाशन, १३ र १४ मा दावी विरोध र १५ गते विहान ११ वजे अन्तिम नामावली प्रकाशनको समय तोकिएको छ ।
पुस १८ गते मनोनयन दर्ता सोही दिन साँझ साढे ५ बजे मनोनयनको सुची प्रकाशन, १९ गते उजुरी छानविन १९ र २० गते विहान १० वजेदेखि ४ बजेसम्म उम्मेदवारी फिर्ता, पुस २० गते साँझ साढे ५ बजे उम्मेदवारहरुको अन्तिम नामावली प्रकाशनको कार्य तालिका बनाईएको छ । त्यसपछि पुस २८ गते विहान ८ बजेदेखि दिउँसो ४ बजेसम्म मतदान गर्नका लागि निर्वाचन कार्य तालिका बनाईएको निर्वाचन समितीका संयोजक यादव भण्डारीले जानकारी दिए ।
कैलाली उद्योग वािणज्यको अव हुन गईरहेको निर्वाचनमा दुई हजार सात सय २५ जनाले मतदान गर्ने पाउँनेछन् । गत वैशाख २२ गतेको साधारण सभा स्थगित हुनुअघि संघका ५ हजार ९ सय ९० जना सदस्य रहेका थिए । अधिकांश नक्कली सदस्यहरुको हालीमुहाली वढेको भन्दै उच्च अदालत दिपायलमा उजुरी परेपछि सदस्यता छानविन गरिएको छ । अदालतकै आदेश अनुसार जिल्ला प्रशासन कार्यालय कैलालीले अहिले निर्वाचनको काम अगाडी वढाएको छ । मिति तय भएसँगै अव निर्वाचनमा सहभागी हुने व्यवसायीहरुले प्रचार प्रसार सुरु गरेका छन् । अहिलेसम्मको अवस्था यसअघिको साधारण सभा हुनु अघि उम्मेदवारी दिएका दुई प्यानल सहित एक अर्को गरी तीन समुहले चुनावी प्रचार प्रसारलाई तिव्रता दिन थालेका छन् ।
सीताराम ओझा दिनेश खवरका संम्पादक हुन्। उनले खेलकुद र समसामयिक विषयमा कलम चलाउछन्।