नेपाली फुटबल टोलीका प्रशिक्षक अल्मुताइरीले पद त्यागको घोषणा गर्दै भने 'अब कहिल्यै नेपाल फर्किने छैन'

काठमाडौं: नेपाली राष्ट्रिय फुटबल टोलीका प्रशिक्षक अब्लुल्लाह अल्मुताइरीले पद त्यागको घोषणा गरेका छन्। 

‘‘अन्तिम तीन दिनमा मैले धेरै नराम्रो अनुभव गरेँ। ममाथि धेरै अरोप लाग्यो। हिजो हाम्रो ३ बजे ट्रेनिङ थियो। त्यसकारण सहायक प्रशिक्षक र अर्को एकजना खेलाडी प्री म्याच प्रेस कन्फ्रेन्समा आएका हुन्। एउटा मिडियाले त्यसैलाई समाचार बनायो र मजाक उडायो,’’ उनले भने। 

‘‘आफ्नो प्रशिक्षकलाई त सम्मान गर्नुपर्छ। हामी प्रशिक्षक हौँ। नोकर होइन। हामी परिवार हौँ। हामी मानव हौँ। हाम्रो बच्चाहरू छन्। मैले त्यो मिडियालाई सोधेँ। म्याच फिक्सिङको अरोप लगाएर खुसी भयौ ? गर्व महशुस भयो ? म नोकर होइन। प्रशिक्षक हुँ। फुटबल विकासका लागि नेपाल आएको हुँ। मैले नेपालमा भएको पत्रकार सम्मेलन भनेको थिए। म इतिहास रच्न चाहन्छु। त्यो आज पूरा भएको छ। अब हामी शनिबार फाइनल खेल्नेछौँ। यो मेरो अन्तिम खेल हुनेछ। त्यो खेलपछि म कहिल्यै नेपाल फर्किने छैन,’’ अल्मुताइरीले भने। 

आज नेपालले साफ च्याम्पियनसिपमा बंगलादेशसँग १–१ को बराबरी खेल्दै फाइनलमा स्थान बनाएको छ। नेपालले साफ च्याम्पियनपसिपको फाइनलमा स्थान बनाएको यो पहिलोपटक हो।