अत्तरियामा ५० रुपैँया नदिएको भन्दै काउन्टरका कर्मचारीबाट चालक कुटिए, खुट्टा भाँचियो

धनगढीः कैलालीको अत्तरियामा यातायात समितिको काउन्टरका कर्मचारीबाट एकजना चालक कुटिएका छन्। सोमबार कैलाली यातायात समितिको काउन्टरका एक जना कर्मचारीले ५० रूपैयाँका लागि विङ्गर चालकलाई कुटपिट गरेका थिए। कुटपिटबाट चालकको खुट्टा भाँचिएको छ। 

सुदूरपश्चिम प्रदेश ०२००१ ज ३८१ नम्बरका विङ्गर चालक कञ्चनपुरको भीमदत्त नगरपालिका वडा नम्बर १६ मजगाँउका २५ वर्षीय गोपाल सामन्तमाथि कुटपिट भएको हो। 

कैलालीको गोदावरी नगरपालिका वडा नम्बर १ विजयनगरका २६ वर्षीय लक्ष्मण विश्वकर्माले ५० रुपैयाँ नदिएको भन्दै बीच सडकमा गाडीभित्रबाटै तानेर कुटपिट गरेको विङ्गरका साहु धन चन्दले बताए। 

उनले भने, “डराइ धम्काइ काउन्टरका कर्मचारीहरुले पैसा माग्ने गर्छन्, अस्ति नै १०० रुपैँया मागेका थिए। चालकले ५० रुपैँया मात्रै दिएको थियो। काउन्टरबालाले ५० रुपैयाँ नदिएको भन्दै हिजो साँझ चालकलाई कुटपिट गरेको हो।”

अत्तरियामा काउन्टरका कर्मचारीले चालकमाथि दादागिरी गर्दै आइरहेको अन्य सवारी चालकहरूले बताएका छन्। सामन्तलाई कुटपिट गरेपछि आज बिहानदेखि कञ्चनपुरको भिमदत्त नगरपालिका भाँसी बेरियरमा विङ्गर चालकहरूले सडकमा चक्काजाम गरेका छन्। 

काउन्टरका कर्मचारीहरुले सवारी चालकलाई कुटपिट गरि घाइते बनाएको भन्दै उनीहरुले सो रूटमा चल्ने सावारीको आवागमनमा रोक लगाएका छन्। लामो दूरीका सवारी साधनहरूलाई भने चल्न दिइएको छ।

सवारी चालकमाथि दादागिरी गर्नेहरुलाई कारबाहीको माग गर्दै सडकमा चक्काजाम गरेको एक विङ्गर चालक रुद्रबहादुर गुरुङले बताए। 

उनले दिनेशखबरसँग भने, “अत्तरिया काउन्टरहरुमा दादागिरी छ। ५० रुपैयाको निम्ति उनलाई बीच सडकमा गाडी रोक्दै घाँटी समातेर बाहिर ताने। कुटपिट गर्दै धक्का दिए।” धक्का दिएपछि सामन्तको पछाडिबाट आइरहेको ट्रकमुनि च्याप्पीएर खुट्टा भाँचिएको उनले बताए। 

काउन्टरका कर्मचारी लक्ष्मण विश्वकर्मालाई इलाका प्रहरी कार्यालय मालाखेतीले नियन्त्रणमा लिएको छ। 

घाइते सामन्तको पदमा अस्पतालबाट थप उपचारका लागि नेपालगञ्ज रेफर गरिएको।