मासिक पौने दुई लाखको जागीर छोडेर रेष्टुरेन्ट सञ्चालन
माासिक सवा एक लाख भारतीय रुपैयाँ अर्थात नेपाली एक लाख ८४ हजार रुपैयाँको जागीर छोडेर घर फर्किदै धनगढीको चटकपुरमा खानाका बिज्ञले रेष्टुरेन्ट सञ्चालन गरेका छन् । नरेन्द्र विक्रम चन्दले भारतमा २० बर्ष होटेल तथा रेष्टुरेन्टमा काम गर्दै आफ्नै ठाउँमा फर्केर त्यहाँ सीकेको सीप सदुपयोग गरेका हुन् । कैलालीको चौमला घर भएर हाल धनगढीकाे चटकपुरका चन्दले चकटपुरमै स्पाईस फेमिली रेष्टुरेष्टमा खानाका जुनसुकै परिकारहरुको नयाँ स्वाद चखाउन सकिने क्षमता राख्छन् । भारतका विभिन्न शहरका अन्तराष्टिय होटेल तथा रेष्टुरेन्टमा सेफको रुपमा काम गर्दै त्यहाँ सिकेको सीपलाई उनले आफ्नै देशमा लगाउँदै खानाका विभिन्न नयाँ परिकारको स्वाद धनगढीमा दिने प्रयास थालेका हुन् ।
४० बर्षीय नरेन्द्र विक्रम चन्दको आधा उमेर अर्थात २० बर्ष भारतमै वित्यो । वुवाको रोजगारी र भाईको पढाई भारतमै भएका कारण भारतको मुम्वई गएर सुरुवातका दिनमा होटेलमा पैसाको प्रवाह नगरी किचन ट्रेनी रुपमा कामको सुरुवात गरे । मुम्वईको १७ बर्षे वसाईमा उनी त्यहाँ खानाका परिकार वनाउने काममा दुई बर्षमै पोख्त वने । त्यसपछि नयाँ नयाँ परिकारहरु वनाउनतिर उनको ध्यान केन्द्रित भयो । उनको माग वढ्यो । त्यसपछि उनले पुनामा र वेङलोरमा पनि काम गरे । भारत छोडेर आउनु अघि उनलाई सवा एक लाख भारतीय रुपैयाँ अर्थात नेपाली एक लाख ८४ हजार रुपैयाँ मासिक पारिश्रमिक दिने भनिएको थियो । तर उनी त्यो पैसाभन्दा पनि आफ्नै ठाउँमा आएर केही गर्नुपर्छ भन्ने सोचेर घर फर्किदै धननगढीको चटकपुरमा स्पाईस फेमिली रेष्टुरेन्ट सञ्चालनमा ल्याए ।
रेष्टुरेन्ट सञ्चालन गरेको दुई बर्ष हुन लागेको छ । तर त्यसवाट सोचे जति आम्दानी नभए पनि खर्च चलिरहेकोमा उनी सन्तुष्ट नै रहेका छन् । नयाँ नयाँ स्वादका खानाका परिकार दिन सक्ने क्षमता चन्दसँग छ । कवाव, करी र मेक्सिकन खानाका परिकारमा निकै पोख्न उनले सवै खानाका परिकारहरु सामान पाएमा धनगढीमै वनाएर ग्राहकको सेवा गर्न सक्छन् । उनीसँगै काम गर्ने धेरै साथीहरु भारत छोडेर विदेश पनि गए । तर उनलाई वुढेसकालमा फर्किनुभन्दा समयमै फर्किएर आफ्नै ठाउामा केही गरौं भन्ने ईच्छा जाँग्यो । सन्ततिको भविष्यलाई पनि प्यारो मानेर उनी सोचेको भन्दा चाँडो घर फर्किए र आफ्नै रेष्टुरेन्ट सुरु गरेका हुन् । आफ्नो सीप आफ्नै ठाउँमा लगाउँदा त्यसको आनन्द नै वेग्लै रहेको उनी वताउँछन् । चन्दले अहिले आफ्नो सीपलाई होटेल म्यानेजमेन्ट पढिरहेका विद्यार्थीहरुलाई बाँडिरहेका छन् । उनलाई धनगढीका विभिन्न कलेजहरुले खानाका परिकारहरु वनाउनका लागि प्रशिक्षकको रुपमा बोलाईरहेका छन् । आफ्नो सीपलाई सवैलाई बाड्न पाउँदा उनी निकै सन्तुष्ट समेत भएका छन् ।
चन्दले रेष्टुरेन्ट सञ्चालन गरे पनि कामदार पाउन मुस्किल छ । त्यही भएर उनले अहिले उनले घर परिवारका सदस्यलाइ पनि तालिम दिएर सिकाइरहेका छन् । धेरै युवाहरु काम छैन भनेर विदेशिने गरेका छन् । तर चन्दको सुझाव छ– काम सानाे तिनो हुँदै कामलाई माया गर्न जानेमा जीवन चलाउनका लागि विदेशिनु पर्दैन ।
सीताराम ओझा दिनेश खवरका संम्पादक हुन्। उनले खेलकुद र समसामयिक विषयमा कलम चलाउछन्।