सुदूर नेपाललाई विश्वसँग जोड्दै

तीन हजार बिन्दुमा पुगेर फर्कियो नेप्से

२०७८ जेठ २६, ०५:४९ रासस

काठमाडौं: तीन हजार बिन्दुमा पुगेर नयाँ कीर्तिमान कायम गरेको धितोपत्र बजारमा शेयर कारोवार मापक नेप्से परिसूचक अन्तिम समयमा भने दोहोरो अङ्कले घटेको छ।

नेपाल स्टक एक्सचेन्जका अनुसार आजको सुरुआती कारोबारमा नेप्सेले तीनहजार बिन्दु छोएको थियो। यो हालसम्मकै उच्च थियो। पुनः बजार सम्हालिएर १३.५६ बिन्दुले नेप्से घटी दुई हजार ९४६.५८ मा ओर्लेको छ। यस्तै, ठूला कम्पनीको शेयर कारोवार मापन गर्ने सेन्सेटिभ परिसूच्क २.८३ बिन्दुले घटेर ५२५.२८ मा झरेको छ। 

कूल २२१ कम्पनीको तीन करोड १३ लाख ५४ हजार २२ कित्ता शेयर १६ अर्ब ९९ करोड ७० लाख ९२ हजार ७०३ मूल्यमा खरिद बिक्री भए। बुधबारको कारोवारपछि बजार पूँजीकरणमा सामान्य गिरावट आएको छ। नेप्सेका अनुसार आजको बजार पूँजीकरण ४० खर्ब ९० अर्ब ७४ करोड ३५ लाख १० हजार बराबर रहेको छ।

कारोवार भएका कूल १३ उपसमूहमध्ये आज छ उपसमूहको शेयर उकालो लागेको छ भने सात उपसमूहको शेयर ओरालो लागेको छ। व्यापार ७८.९३, वित्त ४७.३८, निर्जीवन बीमा ३९, उत्पादन २३७.४६, जीवन बीमा २९.१२ र सामूहिक लगानी कोष ०.०३ बिन्दुले उकालो लागेको छ।

कारोवारका आधारमा आज अरुण भ्याली हाइड्रोपावर शीर्ष स्थानमा रहेको छ। सो कम्पनीको ८७ करोड ९४ लाख ९० हजार १०७ बराबरको कारोवार भयो। यस्तै, पुनरबीमा कम्पनी ६१ करोड ८० लाख ३८ हजार ३९३, नेपाल इन्स्योरेन्स कम्पनी ५१ करोड छ लाख ७१ हजार १५२, लुम्बिनी विकास बैंक ४८ करोड २८ लाख ९८ हजार २१९ र युनाइटेड मोदी ४७ करोड १४ लाख बराबरको कारोवार भई शीर्ष स्थानमा रहे।

यस्तै, नेपाल इन्स्योरेन्स र युनाइटेड मोदीका लगानीकर्ताले समान ९.९५ प्रतिशतले कमाउँदा रिडी हाइड्रोपावर ९.९२, अरुण भ्याली हाइड्रोपावर ९.८६ र सिइडिबि हाइड्रोपावरका शेयरधनीले ९.८६ प्रतिशतले आर्जन गरे। त्यस्तै, युनाइटेड इदी मर्दी हाइड्रोपावर ९.८८, महालक्ष्मी विकास बैंक ६.३७, साइन रेसुङ्गा डेभलपमेन्ट बैंक ६.१५, मितेरी डेभलपमेन्ट बैंक ५.९७ र गरिमा विकास बैंकका लगानीकर्ताले ५.६३ प्रतिशतले गुमाएका छन्। 

कमेन्ट लोड गर्नुस