मनको व्यथा (कविता)
मनमा सल्किएको आगोको ज्वाला,
निभाउने यत्न गरिने छैन त्यहाँ ।
पिँजडामा कैद गरिएका चरीका,
आवाजहरु सुनिने छैन यहाँ ।।
जताततै चीत्कारै चीत्कार अनि,
खुबै खैलाबैला होहल्ला सुनियो।
सदाचारी अगाडि बढ्नुपर्छ भन्ने थियो,
प्रभाव गतिको प¥यो व्यभिचारी चुनियो।।
कैद गरिएका मनका पीडा
सुनाउन सकिने छैन अहिले।
चरम दुखे कोट्याएका घाउहरु
मेरो वास्ता नै गरिएन पहिले।।
ती घाउहरु निको पार्न म कुनै
अस्पताल धाउन सकुँला र?
पीडाहरु यस्तै चर्किने हुन् भने
म पनि कति दिन बाँचुला र!
आँसु नै आँसुको सागर यहाँ
आँसु नै ज्वलन्त उदाहरण बन्यो।
धेरै दुःख सहन सक्दो रहेछ
पीडा ! पीडा !! कोमल मन यो।।
भन्नेहरुले नै भावना बुझ्दैनन्
भन्छन् यहाँ कहाँ दुखेको छ।
दुखाइलाई कसरी वृत्तान्त गरुँ
मेरो हृदय अनि मनमा लुकेको छ।।
-बिमला भण्डारी सामन्त
पञ्चेश्वर गाउँपालिका वडा नम्बर १ बैतडी, हाल भारतको नयाँ दिल्ली