सुदूर नेपाललाई विश्वसँग जोड्दै

‘सरकारले बजार मूल्य वृद्धि नियन्त्रण गर्छ’

२०७७ माघ ५, ०६:१० रासस

गण्डकी : गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले विभिन्न नाममा हुने गरेका मूल्यवृद्धि नियन्त्रण गर्न प्रदेश सरकार प्रतिबद्ध रहेको बताएका छन् । 

गण्डकी प्रदेशसभाको विशेष बैठकमा उठेका एवम् सञ्चारमाध्यममा प्रकाशित सूचनाका आधारमा पोखराका खाद्यान्न तथा निर्माण सामग्रीका ठूला पसलको अनुगमनका क्रममा उनले जथाभावी रुपमा मूल्यवृद्धि गर्नेलाई कारवाही गरिने बताए ।

“व्यापारीले होलसेल नाफा मूल्य सूचीभन्दा बढी रकममा बिक्री वितरण गरेमा कडाभन्दा कडा कारवाही गरिनेछ”, उनले भने, “बजारमा तोकिएको तौल र गुणस्तरमा कुनै पनि सम्झौता हुने छैन ।” उनले सरोकारवाला कार्यालयले बजार अनुगमनलाई तीव्रता दिँदै सरकारकारलाई सहयोग गर्नुपर्नेमा जोड दिए ।

टोलीले पोखरा महानगरपालिका–५ मालेपाटनस्थित आदर्श स्टोर्स, नारायणी आयत रिफाइन उद्योग र नमस्ते हाइवयर एन्ड सप्लायर्स र पोखरा–८ स्थित केएल, दुगर्ड ग्रुपको वितरण केन्द्रको अनुगमन गरेको थियो । अनुगमनका क्रममा नापतौलको प्रमाणपत्र प्रयोगशालामा नपाइएको र अनुमति नलीईकन ८० किलोको यन्त्र प्रयोगस्थलमा पाइएको उद्योग, वाणिज्य तथा उपभोक्ता हित संरक्षण निर्देशनालयका निर्देशक तथा टोली संयोजक नारायण आचार्यले जानकारी दिए।

अनुगमनका क्रममा देखिएका पसल सञ्चालकलाई तीन दिनभित्र सामग्रीसहित सम्बन्धित कार्यालयमा उपस्थित हुन निर्देशन दिइएको बताउँदै उनले सरोकारवाला कार्यालयको संयुक्त टोलीले आवश्यकताअनुसार अनुगमलाई तीव्रता दिँदै आएको उल्लेख गरे । 

टोलीमा सहभागी उपभोक्ता हित संरक्षण मञ्चका अध्यक्ष कपिलनाथ कोइरालाले छिमेकी मुलुक भारतको किसान आन्दोलनका कारण कतिपय कच्चापदार्थ आयात हुन नसक्दा खाने तेल बजारमा अभाव हुनाका साथै मूल्यवृद्धि भएको हुँदा आवश्यक कच्चपदार्थ मुलुकभित्रै उत्पादनमा जोड दिनुपर्ने आवश्यकता औँल्याए ।

कमेन्ट लोड गर्नुस