बाजुरामा मोबाइल चोरदेखि जुत्ता चोरसम्म, ११ महिनामा पक्राउ परे ६० जना चोर
बाजुरा : बाजुरा प्रहरीले ११ महिनामा ६० जना चोरहरुलाई पक्राउ गरेको छ। जिल्लाका विभिन्न ठाउँमा पसलका ढोका र ताला तोडेर मोबाइल तथा जुत्ता चोर्ने लगायतका चोरहरुलाई पक्राउ गरेको जिल्ला प्रहरी कार्यालय बाजुराले जनाएको छ।
सोमबार दिउँसो मात्रै ५ जना चोरहरुलाई पक्राउ गरेको जिल्ला प्रहरी कार्यालय बाजुराले जनाएको छ। बढीमालिका नगरपालिका–८ मा रहेको उद्धव रावलको पसल चोरी गर्न लागेको अवस्थामा प्रहरीले ३ जनालाई पक्राउ गरेको हो। पक्राउ पर्नेमा बुढीगंगा नगरपालिका–३ का १५ वर्षीय चेतराज बिक लगायतका ३ जना भाइ रहेका छन्। उनीहरुबाट ५ हजार ५ सय ५५ रुपैँया नगदसहित २ क्वाटर रक्सी समेत बरामत गरिएको छ।
त्यसैगरी बढीमालिका–७ की भुमीका पण्डितको स्मार्ट मोबाइल चोरेका आरोपमा सोही नगरपालिकाको वडा नम्बर ८ का १६ वर्षीय योगेन्द्र रावललाई प्रहरीले पक्राउ गरेको छ। त्यस्तै सोही वडा कै १४ वर्षीय किरण रावल जुत्ता चोरेको आरोपमा पक्राउ परेको प्रहरीले बताएको छ।
उनीहरु सबैलाई अनुसन्धानका लागि जिल्ला प्रहरी कार्यालय बाजुरामा ल्याइएको जिल्ला प्रहरीले जनाएको छ।
प्रकास सिह दिनेश खवरका बाजुरा संवाददाता हुन्।