Covid-19(Coronavirus) update
World Nepal
Confirmed
Recovered
Deaths

कैलालीको भजनीका बाढीपीडित पुनः विस्थापित

दुर्गा देवकोटा
२०७७ साउन २७, ०३:१४
अ+

टीकापुर: कैलालीको भजनीका बाढीपीडित परिवार पुनः विस्थापित भएका छन्। शनिबार रातिदेखि निरन्तर वर्षा भएपछि भजनीमा पुनः बाढी आउँदा भजनी–८ का ११७ परिवार विस्थापित भएका छन्। 

घर फर्किएको ३ तीनमै पुनः विस्थापित हुनुपरेको बाढीपीडितको गुनासो छ। वर्षाले भजनी–८ खल्लाटोल सोनाहफाँटाका ४०, डाढाटिकका ५२ र कृष्णनगरका २५ परिवारले घर छाडेका छन्। विस्थापित परिवार पथरैया नदीको पुलमाथि पाल टाँगेर बस्न थालेको स्थानीयवासी जयप्रसाद ढुङ्गानाले जानकारी दिए। “बाढी बस्तीमा पसिसकेको छ, पानी रोकिने छाँटकाँट छैन”,उनले भने, “त्रासमा रहेका पीडितले घर छोड्न थाले।”

उनका  अनुसार बस्ती जलमग्न भएको छ। पथरैया, काढा र कान्द्रा नदीको पानी बस्ती पस्ने जोखिम बढेको छ। पीडित धनकला विकको परिवार एक साता पथरैया पुलको बासपछि तीन दिनअघि पानी सुकेपछि घर फर्किएको थियो। विकको परिवारले भत्केको घर मर्मतको तयारी थालेको थियो तर सोमबार बिहानै गाईभैँसी र बालबच्चासहित पुनः सडकमा फर्किएको छ। 

“अन्नपात केही रहेन, लुगाकपडा सबै बगे”, विकले भन्नुभयो, ‘‘ज्यालादारी गरेर भए पनि पेट पालौँला सोचेका थियौँ तर घरमा बस्नै नपाइने भयो।” उनले बाढीले भजनीमा उठिबास लगाएपछि धेरै चिन्ता बढेको बताए। “भोक मेट्न नपाएपछि मानिसको दिमागले काम गर्छ र ?”, विकले गुनासो गरे ‘‘सरकार छ आउँछ, सरकारले पनि के गरोस्, चिउरा, चाउचाउ दिएको छ। हिजो एक कट्टा चामल दिएको थियो, आज त्यही बोकेर पुलमा फर्कियौँ।”

भजनीमा यही साउन १४ गते आएको बाढीले एक हजार ६७१ परिवार विस्थापित भएका थिए। उनीहरु पुनः विस्थापित हुनुपर्ने अवस्था आएको भजनी नगरपालिकाका प्रमुख शेरबहादुर चौधरीले बताए। “नगरपालिकाले बाढी रोक्न सक्ने अवस्था छैन तर उद्धारमा खटेका छौँ”, उनले भने, “कोही भोकै नमरोस् भनी राहतका कार्यसमेत जारी राखेका छौँ। हाम्रो उद्देश्य पीडामा सरकार साथमा छ भन्ने हो।”

तटीयवासीलाई सतर्क रहन आग्रह
मौसम विज्ञान विभागले वर्षा अझै जारी रहने भएकाले तटीय क्षेत्रका नागरिकलाई सुरक्षित स्थानमा बस्न सूचनासमेत गरेको छ। विभागले चिसापानी, टीकापुर, भजनी क्षेत्रका साना तथा ठूला नदीमा पानीको बहाव बढ्न सक्ने चेतावनीसहितको सूचना दिएको छ।

कर्णाली नदीमा पानीको सतह बढेपछि तटीय क्षेत्रमा त्रास शुरु भएको छ। वर्षा निरन्तर भएपछि तटीय क्षेत्रका नागरिकमा त्रास शुरु भएको हो। कर्णाली नदीमा बिहान ६ः३० बजेसम्मको रेकर्डअनुसार पानीको सतह नौ मिटर सात सेन्टिमिटर पुगेको छ। कर्णाली चिसापानीका गेजरिर्डर पार्वती गुरुङका अनुसार कर्णालीको ठूलीगाड, सेती र भेरी नदीमा पनि पानी बढिरहेकाले अझै पानीको सहत बढ्न सक्ने जोखिम रहेको उनले बताए। पहाडतिर भारी वर्षा भएको र नदीमा पानीको सतह बढिरहेकाले तटीय क्षेत्रमा बसोबास गरिरहेका नागरिकलाई सतर्क रहन आग्रह गरेका छन।

नदीमा पानीको बहाव बढेपछि नेपाल रेडक्रस सोसाइटी टीकापुर, भजनी नगरपालिकाले नागरिकलाई सुरक्षित स्थानमा सर्न आग्रह गरेका छन् । चिसापानीमा कर्णाली नदीको सतह नौ मिटर पुगे सतर्क, १० मिटर पुगे पूर्वतयारी र ११ मिटर पुगे तटीय क्षेत्रका लागि खतरा मानिन्छ ।
 

दुर्गा देवकोटा दिनेश खवरका टीकापुर संवाददाता हुन्।

Skip Ad