डोटीका नौ स्थानीय तहमा १२ क्वारेन्टाइन स्थापना

डोटी:  कोभिड–१९ को सङ्क्रमण रोकथामका लागि जिल्लाका नौवटै स्थानीय तहमा क्वारेन्टाइन र आइसोलेशन कक्ष स्थापना गरिएको छ। जिल्लाका  १२ ठाउँमा क्वारेन्टाइन स्थापना गरिएका छन्  

कोरोना भाइरसको सङ्क्रमण रोकथामका लागि धमाधम क्वारेन्टाइन निर्माण गर्न थालिएको सुदूरपश्चिम गाउँपालिका अध्यक्ष महासङ्घ तथा जोरायल गाउँपालिकाका अध्यक्ष दुर्गादत्त ओझाले जानकारी दिए। त्यस्तै यहाँका स्थानीय तहका जनप्रतिनिधिले आआफ्नो स्थानीय तहमा क्वारेन्टाइनसहितको हेल्थ डेस्क स्थापना गर्न थालेका छन्। 

दिपायल सिलगढी, शिखर नगरपालिका, सायल, पूर्वीचौकी, आदर्श, बोगटान फुड्सिल, बडीकेदार, जोरायल तथा केआइसिंह गाउँपालिकामा क्वारेन्टाइन र आइसोलेशन कक्ष निर्माण भएको जिल्ला समन्वय समितिका संयोजक रामबहादुर ऐरले बताए। उनले भने, “जिल्लाका सबै स्थानीय तहमा भारतमा काम गरेर फर्किनेहरु बढी भएकाले उनीहरुलाइ मध्यनजर गर्दै सबै स्थानीय तहमा स्वास्थ्यकर्मीसहितको क्वारेन्टाइन र आइसोलेशन कक्ष स्थापना भएका छन, भारतबाट आएका सबैले अनिवार्य क्वारेन्टाइनमा बस्नुपर्ने।”

पछिल्लो समय गाउँघरमा भएका विद्यालय तथा केही सहकारी र संस्थाका कार्यालय बन्द भएकाले तिनमा स्वास्थ्यकर्मी र शय्यासहितको क्वारेन्टाइन राख्न थालिएको जोरायल गाउँपालिकाका स्वास्थ्य संयोजक गोविन्द विष्टले बताए। 

त्यसैगरी कोरोना भाइरसको सङ्क्रमणबाट बच्न जिल्लाका दुई गाउँपालिकाले विपद् व्यवस्थापन कोषसमेत स्थापना गरिसकेका छन्। जिल्लाको पूर्वी क्षेत्रमा पर्ने बोगटान फुडिसल गाउँपालिकाले ५० लाख तथा पश्चिमी क्षेत्रमा पर्ने सायल गाउँपालिकाले ३० लाखको विपद् व्यवस्थापन कोष खडा गरेका छन्। 

उता जिल्ला विपद् व्यवस्थापन समितिको बैठकले स्थानीय नागरिकलाई आफैँ सुरक्षित हुन भन्दै अत्यावश्यक कामबाहेक घर बाहिर ननिस्कन आग्रह  गरेको छ। प्रमुख जिल्ला अधिकारी तथा जिल्ला विपद् व्यवस्थापन समितिका अध्यक्ष टेकनारायण पौडेलको अध्यक्षतामा बसेको बैठकमा डोटी बहुमुखी क्याम्पसमा आवश्यकतानुसार क्वारेन्टाइन र आइसोलेशन केन्द्र स्थापना गर्ने निर्णयसमेत भएको छ। 

जिल्लाका स्थानीय तहमा स्थापना गरिएका आइसोलेशन बेड र क्वारेन्टाइनको अवस्था तथा अन्य उपकरण भए नभएका बारेमा बुझ्न छुट्टै स्वास्थ्यकर्मीको टोलीसमेत परिचालन गरिने जिल्ला स्वास्थ्य व्यवस्थापन समिति डोटीका अध्यक्ष यज्ञराज जोशीले बताए। 

त्यसैगरी जिल्लामा अत्यावश्यक सामग्रीको व्यवस्थापन गर्न उद्योग वाणिज्य सङ्घ र डोटी चेम्बर अफ कमर्शलाई जिम्मेवारी तोकिएको जिल्ला प्रशासन कार्यालयले जनाएको छ। कोरोना भाइरसको सङ्क्रमणबाट जोगिन सरकारले लकडाउन गरेसँंगै जिल्लाका कलकारखाना, उद्योग, बजार पूर्ण रुपमा बन्द भएका छन् भने मानिसको आवतजावतमा पनि कमी आएको छ। -रासस