भरुवा बन्दुकसहित २ जना पक्राउ
सशस्त्र प्रहरी बल नेपाल नम्बर ३१ गण हेडक्वाटर बर्दियाले भारत—नेपाल सीमावर्ती क्षेत्र नजिकै भरुवा बन्दुक र बन्दोवस्तीका सामाग्रीसहित २ जनालाई नियन्त्रणमा लिएको छ। मधुवन नगरपालिका ७ का दुई जनालाई हतियारसहित गएराति नियन्त्रणमा लिइएको हो।
सशस्त्र प्रहरीले ३६ वर्षीय दिलबहादुर चौधरी र ५० वर्षीय लिलबहादुर कुँवरलाई पक्राउ गरेको हेडक्वाटरका प्रहरी उपरीक्षक यादव विश्वकर्माले जानकारी दिए। उनीहरुबाट १ नाल भरुवा बन्दुक प्रहरीले फेला पारेको छ।
प्रहरीका अनुसार उनको साथबाट गोली ४७ थान, केप ८ पीस, बारुद २५० ग्राम, सानो छर्रा २६ पीस, खुकुरी १, बञ्चरो १, चक्कु १ र ३ वटा साइकल बरामद गरिएको छ। प्रारम्भिक अनुसन्धानअनुसार उनीहरु भारतीय जंगलतर्फ शिकार खेल्न जानेक्रममा रहेको प्रहरीले जनाएको छ। आवश्यक अनुसन्धानका लागि नियन्त्रणमा लिएका दुवैजनालाई प्रहरीको जिम्मा लगाइएको एसपी विश्वकर्माले जानकारी दिए।