हङ्कङमाथि नेपाल सहज विजय

बाङ्ग्लादेशमा भइरहेको एसीसी इमर्जिङ टीम्स एशिया कप अन्तर्गतको दोस्रो खेलमा विजयी भएपएिको छ। शनिवार पहिले ब्याटिङ गर्दै नेपालले ५० ओभरमा दुई सय १७ रन बनाएको थियो। हङ्कङले ४५ दशमलव ५ ओभरमा एक सय ७७ रन मात्रै बनायो र प्रतियोगिताबाट बाहिरियो।सोमवार नेपालले बलियो देखिएको आयोजक बाङ्ग्लादेशलाई हराए सेमीफाइनलमा पुग्ने सम्भावना रहनेछ।

हङ्कङले टस जितेर नेपाललाई ब्याटिङ गर्न लगाएको थियो। कप्तान ज्ञानेन्द्र मल्ल बिहीवार भारतसँगझै खेलको दोस्रो बलमा नै आउट भए। अर्का ओपनर कुशल भुर्तेल पनि तुरुन्तै आउट भएपछि नेपाल सङ्कटमा परेको थियो। तर भेषवाकर, उपकप्तान दीपेन्द्रसिंह ऐरी र आशिफ शेखले राम्रो ब्याटिङ प्रदर्शन गरे। ऐरीले ६७ बलमा ३७ रन र शेखले ४८ बलमा तीन छक्का सहित ४२ रन बनाए।

अन्तिम ओभरसम्म टिकेका भेषवाकरले भने एक सय ३९ बल खेल्दै नौ चौकाको सहायताले ८९ रन बनाए। उनले भारतसँगको पहिलो खेलमा पनि ४४ रन बनाएका थिए। नेपालको तल्लोक्रमका खेलाडीले आक्रामक ब्याटिङ गर्न सकेका भए नेपालको स्कोर अझ राम्रो हुन्थ्यो तर विनोद भण्डारी (१५ रन) बाहेक अन्य कसैले पनि दोहोरो अङ्कमा रन बनाउन सकेनन्। हङ्कङका तर्फबाट आइजाज खानले तीन एवम् नासरुल्ला राना र अहसान नवाजले दुईरदुई विकेट लिएका थिए।

करण केसी र अविनाश बोहोराले सुरुमै प्रभावकारी बलिङ गरेपछि हङ्कङ समस्यामा र्पयो। बोहोराले तीन र केसीले दुई विकेट लिँदा हङ्कङले १२ ओभरमा पचास रन नबनाउँदै पाँच खेलाडी गुमायो। तर किन्चित शाह र हरुन अर्सादले मिलेर ६२ रन बनाउँदै हङ्कङलाई खेलमा फर्काउने प्रयास गरे। अर्साद २६ रनमा रहँदा केसीको तेस्रो विकेटका रूपमा आउट भए भने ८० बलमा ५३ रन बनाएका शाहलाई सुसन भारीले आउट गरे।

नेपाल रहेको समूह ’बी’मा भने भारतलाई बाङ्ग्लादेशले छ विकेटले हराएको छ। भारतले दिएको दुई सय ४७ रनको लक्ष्यलाई आयोजकले ४२ शसमलव १ ओभरमा चार विकेट गुमाएर प्राप्त गरेको हो।
समूह ’ए’मा भने बिहीवार श्रीलङ्कालाई हराएर अविश्वनीय नतिजा निकालेको ओमानलाई अफगानिस्तानले नौ विकेटले हराएको छ। ओमानले ४४ ओभरमा १५३ रन बनाएकोमा अफगानिस्तानले त्यो लक्ष्य ३० शसमलव ५ ओभरमै एक विकेट गुमाएर पुरा गरेको हो। तर श्रीलङ्का भने लगातार दोस्रो खेल हारेर प्रतियोगिताबाटै बाहिरिएको छ।
शनिवार पाकिस्तानले श्रीलङ्कालाई ३० दशमलव ४ ओभरमा ९३ रनमा आउट गर्दै ९० रनले हरायो र सेमीफाइलन पुग्ने पहिलो टोली बन्यो।