कञ्चनपुरका एक जनाले पाए २५० रुपैयाँको खरिदमा १० लाखको बम्पर उपहार

धनगढीः करदाता प्रोत्साहन उपहार योजनाअन्तर्गत साउन महिनाको पहिलो १५ दिनको बम्पर उपहारको नतिजा सार्वजनिक भएको छ।

कञ्चनपुरको पुनर्वासस्थित शिव कृष्ण जनरल स्टोरबाट २५० रुपैयाँको सामान खरिद गरेका व्यक्तिले १० लाख रुपैयाँको उपहार जितेका हुन्। कुपन नम्बर ००७ ३१५ २५४ ४९३ भएका उपभोक्ताले १० लाख रुपैयाँ जितेका हुन्। उनले साउन ७ गतेको दिन सामान किनेका थिए। विजेताको नाम भने सार्वजनिक गरिएको छैन।

अन्य १५ जनाले भने एक–एक लाख रुपैयाँको उपहार जितेका छन्। आन्तरिक राजश्व विभागले आज अर्थ मन्त्रालयमा एक कार्यक्रम गरेर उपहार विजेताबारे जानकारी दिएको हो।

करदाता प्रोत्साहन उपहार योजनाअन्तर्गत उपभोक्तालाई बिल लिने बानीको विकास गराउने र कर प्रणालीलाई थप प्रभावकारी बनाउने उद्देश्यले यो योजना सञ्चालन गरिएको हो।