राकेशकुमार दास विरुद्ध आरोपपत्र दर्ता
काठमाडौँ : राकेशकुमार दास विरुद्ध आज विशेष अदालतमा आरोपत्र दर्ता गरिएको छ।
अख्तियार दुरुपयोग अनुसन्धान आयोगले दासलाई शैक्षिक योग्यताको नक्कली प्रमाणपत्र पेस गरी जागिर गरेको आरोपमा मुद्दा दर्ता गरिएको हो। निजलाई भ्रष्टाचार निवारण ऐन, २०५९ अनुसार विशेष अदालतमा आरोपत्र दायर गरेको आयोगका प्रवक्ता सुरेश न्यौपानेले जानकारी दिए।
दास बिपी कोइराला स्वास्थ्य विज्ञान प्रतिष्ठान धरानमा कार्यरत हुनुहुन्छ। उनले भारतको बिहार स्कुल एक्जामिनेसन बोर्ड पटनाबाट इन्टरमिडियट तह र वेन्केटेश्वर युनिभर्सिटी तिरुपतिबाट स्नातक तह, कम्प्युटर साइन्सको झुटा शैक्षिक प्रमाणपत्र पेस गरी कम्प्युटर पदमा नियुक्ति लिनुभएको थियो। आयोगले दासलाई भ्रष्टाचार निवारण ऐन, २०५९ को दफा (१६) को उपदफा (१) बमोजिमको कसुर गरेको पुष्टि भएको हुँदा निजलाई भ्रष्टाचार निवारण ऐन, २०५९ को दफा १६ को उपदफा (१) बमोजिम कैद र जरिवाना सजाय हुन माग दाबी गर्दै आज विशेष अदालत काठमाडौँमा आरोपपत्र दायर गरिएको छ।