फिफाले लगायो नेपालमाथि प्रतिबन्ध
काठमाडौँ: अन्तर्राष्ट्रिय फुटबल महासंघ (फिफा) ले बिहीबार नेपालमाथि प्रतिबन्ध लगाएको घोषणा गरेको छ। नेपाली फुटबलको इतिहासमा फिफाले नेपाललाई प्रतिबन्ध लगाएको यो पहिलो घटना हो, जसले देशको फुटबल क्षेत्रलाई अनिश्चितता र अन्योलतर्फ धकेलेको छ।
फिफाले आफ्नो आधिकारिक वेबसाइटमार्फत सार्वजनिक गरेको जानकारीअनुसार, ब्युरो अफ द काउन्सिलको निर्णयबमोजिम नेपालमाथि प्रतिबन्ध लगाइएको हो। फिफाले तेस्रो पक्षको हस्तक्षेपलाई प्रतिबन्धको मुख्य कारणका रूपमा उल्लेख गरेको छ।
यसअघि राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) लाई तीन महिनाका लागि निलम्बन गरेको थियो। यद्यपि, उक्त निलम्बन पछि फुकुवा भइसकेको छ। राखेपले एन्फाको प्रस्तावित निर्वाचनलाई मान्यता नदिएपछि चुनाव स्थगित भएको थियो। साथै, पंकज नेम्वाङ नेतृत्वको वर्तमान कार्यसमितिको कार्यकाल पनि समाप्त भइसकेको छ।
