माछापुच्छ्रे बैंकद्वारा कञ्चनपुरको बैजनाथ माविलाई डेढ लाख बराबरको फर्निचर सहयोग

कञ्चनपुरः माछापुच्छ्रे बैंक लिमिटेड, धनगढी (कैलाली) शाखाले कञ्चनपुरको बेलडाँडी गाउँपालिका वडा नं. ५, झिमलिबिलास्थित बैजनाथ माध्यमिक विद्यालयलाई संस्थागत सामाजिक उत्तरदायित्व (सिएसआर) अन्तर्गत भौतिक सामग्री सहयोग गरेको छ। बैंकले विद्यालयको शैक्षिक तथा भौतिक वातावरण सुदृढीकरणका लागि एक लाख पचास हजार रुपैयाँ बराबरको विभिन्न फर्निचर सामग्रीहरू प्रदान गरेको हो।

एक विशेष कार्यक्रमका बीच बुधवार माछापुच्छ्रे बैंक लिमिटेडका सुदूरपश्चिम प्रदेश प्रमुख विष्णु लामिछाने र धनगढी शाखा प्रबन्धक शिवराज पाठकले विद्यालय परिवारलाई उक्त सामग्रीहरू हस्तान्तरण गरे। हस्तान्तरण गरिएका सामग्रीहरूमा ३–सिटर सोफा सेट २ थान, १–सिटर सोफा सेट २ थान, स्टिल बुकर्‍याक ४ थान, संगीत दराज १ थान, स्टाफ टेबल २ थान, स्टिल बक्स ४ थान र स्लिपिङ बेड २ थान रहेका छन्।

सामग्री ग्रहण गर्दै विद्यालयका प्रधानाध्यापक तीर्थराज भट्टले कृतज्ञता व्यक्त गर्दै माछापुच्छ्रे बैंकलाई सहयोगका लागि धन्यवाद ज्ञापन गरे। उनले विद्यालयमा अत्यावश्यक रहेका सामग्रीहरू उपलब्ध हुँदा शैक्षिक वातावरण निर्माणमा महत्त्वपूर्ण सहयोग पुग्ने बताए। 'बैंकले व्यावसायिकताभन्दा माथि उठेर दूरदराजका बालबालिकाको उज्यालो भविष्यका लागि बढाएको यो सहयोगी हात वास्तवमै अनुकरणीय छ,' प्रधानाध्यापक भट्टले भने।

कार्यक्रममा बैंकका प्रदेश प्रमुख लामिछानेले संस्थाले व्यवसाय सञ्चालनसँगै सामाजिक उत्तरदायित्व अन्तर्गत शिक्षा, स्वास्थ्य तथा सामाजिक विकासमा सधैँ कार्य गरिरहेको र यस पटक शिक्षा क्षेत्रमा योगदान गर्न पाउँदा खुसी लागेको बताए। उनले आगामी दिनमा पनि विद्यालयसँग हातेमालो गर्दै अघि बढ्ने प्रतिबद्धता व्यक्त गरे।

भौतिक सामग्री प्राप्त भएसँगै विद्यालयको कार्यालय व्यवस्थापन, पुस्तकालय तथा विद्यार्थीहरूको सिकाइ वातावरण अझ सहज र व्यवस्थित बन्ने विश्वास विद्यालय व्यवस्थापन समिति र प्रधानाध्यापकले व्यक्त गरे।

उक्त कार्यक्रममा त्रिभुवन विश्वविद्यालयका उपप्राध्यापक तथा साहित्यकार भुवन बोहराको समेत उपस्थिति रहेको थियो। कार्यक्रममा बोल्दै उपप्राध्यापक बोहराले विद्यार्थीहरूलाई सकारात्मक ऊर्जा र उत्प्रेरणा प्रदान गर्दै आफ्नो महत्त्वपूर्ण मन्तव्य राखेका थिए।

कार्यक्रममा बेलडाँडी गाउँपालिका वडा नं. ५ का वडा अध्यक्ष इन्द्रबहादुर खड्काले बैंकलाई धन्यवाद ज्ञापन गरे। उक्त अवसरमा विद्यालय व्यवस्थापन समितिका पदाधिकारी, शिक्षक-अभिभावक संघका अध्यक्ष, शिक्षक तथा विद्यार्थीहरूको उपस्थिति रहेको थियो।