कैलालीमा बीउ उत्पादन गर्दै सहकारी
कैलालीः कैलालीको जानकी गाउँपालिका–४ मुनुवामा रहेको बिज वृद्धि कृषक सहकारी संस्थाले दशकभन्दा लामो समयदेखि बीउ उत्पादनमा जोड दिँदै आएको छ।
किसानलाई बीउ उत्पादनमा प्रोत्साहन गर्दै प्राविधिक सहयोग दिएर सहकारी संस्थाले बीउ उत्पादनमा जोड दिँदै आएको हो। खाद्यान्न, दलहन, तेलहन बालीको लागि सहकारीले उन्नत, प्रमाणित र मूल बीउ उत्पादन गर्दै आएको छ। सहकारीले आफ्नो प्राविधिकको निगरानीमा उत्पादन गर्दै आएको बीउ किसानबाट बजार मूल्यभन्दा ३०० बढी दिएर खरिद गर्ने गरेको छ।
सहकारी संस्थामा आबद्ध १५० किसानले बीउ उत्पादनको काम गर्दै आएका छन्। सिजनअनुसार धान, गहुँ, तोरी, मसुरोलगायतको बीउ उत्पादन गर्दै आएका रतनबहादुर बढायक सहकारीले दिँदै आएको सेवाबाट प्रभावित छन्। खेती आफूले लगाउनु परे पनि समयसमयमा हुने प्राविधिकको निगरानीले उत्पादनमा समेत वृद्धि हुने गरेको उनको भनाइ छ। किसानलाई आवश्यक मलको व्यवस्था पनि सकेसम्म सहकारी आफैँले गर्दै आएको छ। “बजारको समस्या छैन। उत्पादन सोचेभन्दा राम्रो हुन्छ। अझै राम्रो गर्न सके सहकारीले पुरस्कृतसमेत गर्छ। उनी भन्छन्, “किसानको लागि सहकारीको काम निकै प्रशंसायोग्य छ।
सहकारीलाई अहिले धानको बीउ ग्रेडिङमा भ्याइनभ्याइ छ। यस वर्ष चार हजार क्विन्टल धानको बीउ सहकारीले भण्डार गरेको छ। त्योमध्ये अधिकांश धानको बिक्री प्रक्रियामा गइसकेको सहकारीका व्यवस्थापक गोविन्दराज रावत बताउछन्। “झण्डै छ जातको धानको बीउ हामीसँग छ। अधिकांश बिक्री प्रक्रियामा गइसकेको छ”। उनी भन्छन्, “बर्सेनि बीउको माग बढ्दै गएको छ । सहकारीले मागअनुसार पु¥याउन सकेको छैन।”
व्यवस्थापक रावतका अनुसार सहकारीले किसानलाई उन्नतमा मोटो ७०, मध्यम ७३ र मसिनो प्रतिकेजी ८० रुपैयाँमा बिक्री गर्दै आएको छ। त्यसैगरी प्रमाणित बीउ प्रतिकेजी ७५, ७८ र ८५ रुपैयाँमा र मूल बीउ भने प्रति केजी ८०, ८३ र ९० रुपैयाँमा बिक्री गर्दै आएको छ। “हाम्रो बीउ सुदूरपश्चिम प्रदेशसँगै कर्णाली, लुम्बिनी र मधेस प्रदेशसम्म पुग्ने गरेको छ”, रावत भन्छन्, “अहिले स्थानीय सरकारले पनि बीउ खरिद गरेर लिने गरेको छ। अहिले भइरहेको माग पूरा गर्न सात हजार क्विन्टल धान र गहुँको बीउ उत्पादन गर्न सक्नुपर्छ।”
सहकारीले यस वर्ष एक करोड ४१ लाख ५९ हजार ६८८ को धानको बीउ किसानसँग खरिद गरेको थियो। गत वर्ष एक करोड २५ लाख ८४२ को गहुँको बीउ खरिद गरेको सहकारीले चार लाख ९४ हजार ५१५ को तोरीको बीउ किसानबाट खरिद गरेको सहकारीका अध्यक्ष विजयकुमार कठरियाले जानकारी दिए।
सहकारीसँग पाँच हजार क्विन्टल बीउ भण्डार गर्ने क्षमताको गोदाम रहेको छ। विभिन्न सरकारी निकायबाट राम्रो अनुदान पाइरहेको सहकारीका लागि रानी जमरा कुलरिया सिँचाइ आयोजनाको कृषि कार्यक्रम कार्यान्वयन एकाइ, राष्ट्रिय कृषि आधुनिकीकरण परियोजना, कृषि ज्ञान केन्द्र कैलाली ठूलो सहयोगी दाताको रुपमा रहेको अध्यक्ष कठरिया बताउछन्।
गहुँ पाक्ने समयमा आएको यस वर्षको हावाहुरीका कारण गहुँमा ठूलो क्षति भएपछि बीउ सङ्कलन हुनेमा अध्यक्ष कठरियाले चिन्ता व्यक्त गरेका छन्। “पाँच हजार क्विन्टल गहुँको बीउ उत्पादन गर्ने लक्ष्य सहकारीले लिएको थियो। त्यसैअनुसार किसानलाई बीउ उत्पादनमा जोड दिएका थियौँ”, उनी भन्छन्, “हावाहुरीले ९५ प्रतिशत गहुँमा क्षति पु¥याएपछि त्यो बीउ हुँदैन”, बीउका लागि लगाएको किसानको गहुँ भने सहकारीले आफैँ खरिद गरेर बजारीकरण गरिदिने निर्णय गरेको छ।
