बाजुराबाट नेकपा एमालेका उम्मेदवार थापालाई मतृशोक
बाजुराः देशैभर विभिन्न पार्टीका उम्मेदवार मतदाताको घरदैलो पुगेर आफूलाई र आफ्नो पार्टीलाई मत मागिरहेका छन् । तर, बाजुरामा नेकपा एमालेका उम्मेदवार लालबहादुर थापा भने शोकमा छन् । एमाले केन्द्रीय कमिटी सदस्यसमेत रहेका थापाकी आमा कलशी थापाको ८९ वर्षको उमेरमा निधन भएको छ ।
बुढीगंगा नगरपालिका–२ ताप्रास्थित आफ्नै निवासमा निधन भएको थियो । ‘त्यो बेला उम्मेदवारसहित जगन्नाथ गाउँपालिकामा घरदैलोमा थियौँ । घरमा आमाको स्वास्थ्य अवस्था जटिल भएको थाहा पाएपछि उहाँ सबै कार्यक्रम छाडेर आमालाई भेट्न घर पुग्नु भएको थियो,’ घरदैलोमा सँगै रहेका प्रेस चौतारीका केन्द्रीय सदस्य कृष्ण ओलीले भने, ‘तर, आमाले संसार छोड्नु भयो ।’
उम्मेदवार थापा अहिले घरमा किरियामा छन् । उनलाई भेट्न आउनेहरू सान्त्वना दिन्छन् । निर्वाचनको लागि मत माग्न व्यस्त हुनुपर्ने अवस्थामा बरखीमै रहेका थापाले घरमै आएकाहरूलाई आफ्ना योजनाहरू सुनाउँछन् । २०५४ सालमा जिल्ला विकास समितिको सभापति र २०७४ सालमा प्रतिनिधि सभा सदस्य हुँदा उनले गरेका कामहरूले अहिले पनि बाजुरामा लोकप्रिय छन् ।
थापा घरदैलोमा जान नपाउँदा पनि केन्द्रीय सदस्यहरू, जिल्ला अध्यक्षसहितको टोलीले घरदैलो अभियानलाई निरन्तरता दिएका छन् । जगन्नाथबाट हिमाली गाउँपालिका पुगेको टोलीले आज धुलाचौरमा अगुवा नेता कार्यकर्तासँगै भेटघाट गर्ने कार्यक्रम छ ।
