कञ्चनपुर क्षेत्र–१ मा रोकिएका योजना अगाडि बढाउँछु : नेता तामाङ

कञ्चनपुरः कञ्चनपुर निर्वाचन क्षेत्र १ मा नेकपा एमालेबाट उम्मेदवार बनेका तारालामा तामाङले यहाँका रोकिएका योजना अगाडि बढाइने बताएका छन्।
सोमबार पत्रकार सम्मेलनमा बोल्दै नेता तामाङले यस अघि अगाडि बढाइएका योजनाहरू वर्तमान सरकारले रोकेकाले निर्वाचित भएपछि ती योजनाहरू अघि बढाइने प्रतिबद्धता जनाए। 

तामाङले कञ्चनपुर क्षेत्र नम्बर १ का एक सय नौ करोडका योजनाहरू वर्तमान सरकारले रोकेको बताए। चानदेवबाट रतनपुर हुँदै चिनिमिल जाने सडक, पुनर्वासको पुरेनादेखि अम्रेया हुँदै गोविन्द गौतम पार्कसम्मको सडक, बेलौरी बेलडाँडीको सिमसार क्षेत्र, लगायतका थुप्रै योजनाहरू ठेक्का सम्झौता भएर मन्त्रालयले सदर नगर्दा काम रोकिएको उनले बताए। 

सरकार अनुकूलता हुँदा केही योजनाहरूमा बजेट विनियोजन गरिए पनि वर्तमान सरकारले ती योजनाहरू रोक लगाउँदा यस क्षेत्रको विकास हुन नसकेको उनले जिकीर गरे। ती योजनाहरूलाई निरन्तरता दिनुपर्ने उनको भनाई छ। 

केही समययता नकारात्मक कुराहरू बढी फैलाउने जस्ता कार्यहरू हुँदै आएकाले आगामी निर्वाचनमा जनताले विकास प्रेमी उम्मेदवारलाई मत खसाल्न जरुरी रहेको उनले बताए। 
यो क्षेत्रको समृद्धि, विकास तथा योजनाको सन्दर्भमा उठाएका आवाजलाई निरन्तरता दिनका लागि फागुन २१ को निर्वाचनमा आफू उम्मेदवार बनेको उनले बताए। 

यस क्षेत्रको मुख्य समस्या खुला सीमा नाका कारण यहाँका बालबालिका, युवाहरू लागू औषधको दलदलमा फस्दै गएको उनले उल्लेख गरे । खुला नाका कारण अखाद्य वस्तुहरू नाका भएर भित्र्याइने गरेकाले यसको पूर्णरुपमा रोक लगाउनका लागि सरकारले ठोस कदम चाल्न जरुरी रहेको उनको भनाइ छ। 

यस क्षेत्रको आरक्षपीडितका समस्या समाधान, विकास आयोजना अगाडि बढाउन आफू उम्मेदवार बनेको उनले बताए। सरकार आफू अनुकूल नहुँदा पनि यस क्षेत्रका थुप्रै योजना अगाडि बढाइएको उनले बताए। 

“यस अघि २०७९ मा निर्वाचित भएपछि सङ्घमा केही अभ्यास मात्रै गर्न पाइएको थियो”, उनले भने, “अब यस क्षेत्रको विकास निर्माणका कामहरू तथा रोकिएका योजनाहरू अगाडि बढाउन उम्मेदवार बनेको छु।” कञ्चनपुर क्षेत्र १ को विकासका लागि सधैँ अग्रसर रहेको उनले बताए। 

तामाङ अघिल्लो निर्वाचनमा बाम गठबन्धनका उम्मेदवार बीना मगरलाई पाँच हजार ४७८ मतान्तरले पराजित गर्दै क्षेत्र नम्बर १ बाट विजयी भएका थिए। तर जेनजी आन्दोलनपछि संसद् विगठन भएपछि आगामी निर्वाचनका लागि नेकपा एमालेले तामाङलाई पुनः उम्मेदवार बनाएको हो ।