सुपर टाइफुन ‘फङ–वोङ’को प्रहारअघि नै फिलिपिन्समा करिब १० लाख विस्थापित
फिलिपिन्स: फिलिपिन्समा यस वर्षको सबैभन्दा शक्तिशाली आँधी सुपर टाइफुन ‘फङ–वोङ’ (स्थानीय नाम उवान) उत्तर–पूर्वी तटतर्फ नजिकिँदै गर्दा करिब १० लाख मानिसलाई सुरक्षित स्थानमा सार्न बाध्य बनाएको छ। सुपर टाइफुनले प्रशान्त महासागरबाट तीव्र गति लिएर देशभर बिजुली अवरुद्ध गरिसकेको छ।
फङ–वोङले करिब दुई–तिहाइ भू–भागलाई आफ्नो व्यापक हावा र वर्षाको घेराभित्र ल्याउने अनुमान गरिएको छ। फिलिपिन्स मौसम विभागका अनुसार पूर्वी क्याटान्डुआनेस प्रान्त नजिक आइतबार दिउँसो टाइफुन प्रवेश गर्ने र सोमबार बिहान अरोरा वा इसाबेला प्रान्तमा अवतरण गर्ने सम्भावना छ।
देशका अधिकारीहरूले उच्च जोखिम भएका ९ लाख १६ हजारभन्दा बढी नागरिकलाई पूर्व–तयारीका रूपमा सुरक्षित स्थानमा सारिसकेका छन्। राष्ट्रपति फर्डिनान्ड मार्कोस जुनियरले राष्ट्रव्यापी आपतकाल घोषणा गरेका छन् भने रक्षा मन्त्रालय र नागरिक सुरक्षा कार्यालयले नागरिकहरूलाई सतर्क रहन र सुरक्षा निर्देशन पालन गर्न आग्रह गरेका छन्।
फिलिपिन्स विश्वकै सबैभन्दा प्राकृतिक विपत्तिमा संवेदनशील राष्ट्रमध्ये एक मानिन्छ। यहाँ हरेक वर्ष करिब २० वटा टाइफुन आउँछन्, साथै भूकम्प र सक्रिय ज्वालामुखीहरूको जोखिम पनि उच्च छ। फङ–वोङको प्रभावले पूर्वी तटका गाउँ र शहरमा बाढी, माटोको बहाव र जीवनघातक परिस्थितिहरू सिर्जना गर्ने अनुमान गरिएको छ।