गुरु पूर्णिमामा लक्ष्मीनारायण मन्दिरमा श्रद्धाभावपूर्वक गुरु पूजन सम्पन्न

धनगढी: गुरु पूर्णिमा, गुरूप्रति श्रद्धा, भक्ति र सम्मान व्यक्त गर्ने विशेष पर्व। यही अवसरमा धनगढी–१ स्थित लक्ष्मीनारायण मन्दिरमा गुरु पूजन विधिपूर्वक सम्पन्न गरिएको छ।

मन्दिर परिसरमा बिहानैदेखि भक्तजनहरूको उपस्थितिमा श्री विष्णु सहस्रनाम पाठ पारायण गरिएको थियो। यस धार्मिक अनुष्ठानमा संस्कृत पाठशालाका बटुकहरू, स्थानीय श्रद्धालुहरू तथा धर्मप्रेमीहरूले सहभागिता जनाएका थिए।

रामानुज सम्प्रदायका मठाधीशको पूजन

पाठ पारायणपछि रामानुज उत्तर रामेश्वरम् मठका मठाधीश, श्री १००८ स्वामी देवराज आचार्यको विशेष पूजन गरिएको थियो। उपस्थित भक्तजनहरूले गुरूको चरणमा फूल, अक्षता, चन्दन अर्पण गर्दै गुरूलाई ब्रह्म स्वरूप मानेर श्रद्धापूर्वक वन्दना गरे।

व्यास जयन्तीको पनि सम्झना

मन्दिरका व्यवस्थापक हरिप्रसन्न न्यौपानेका अनुसार, गुरु पूर्णिमा र व्यास जयन्तीको अवसरमा प्रत्येक वर्ष वैदिक परम्पराअनुसार गुरूपूजा आयोजना गरिँदै आएको छ। "गुरु ज्ञानको ज्योति हुन्, जीवनका मार्गदर्शक हुन्," न्यौपानेले भने, "त्यसैले यो पर्व आध्यात्मिक आभार प्रकट गर्ने अवसर पनि हो।"

गुरु पूर्णिमालाई महर्षि वेदव्यासको जन्मजयन्तिको रूपमा पनि मनाइन्छ। वेद, पुराण र महाभारतको रचनाकारका रूपमा चिनिने वेदव्यासको योगदानको स्मरण गर्दै देशभर विभिन्न आश्रम, मठ, विद्यालय र मन्दिरहरूमा पूजाआजा, प्रवचन र धार्मिक कार्यक्रमहरू आयोजना गरिन्छन्।