युएईमा भिजिट भिसामा आफन्त लैजानेहरुका लागि एनओसी जारी नगरिने
युएई स्थित नेपाली दूतावासले जारी गर्दै आएको नो अब्जेक्सन सर्टिफिकेट (एनओसी) जारी नगर्ने निर्णय गरेको छ। आइतबार एक सुचना जारी गर्दै दूतावासले सोमबारदेखि एनओसी जारी नगर्ने निर्णय गरेको दूतावासकी द्धितीय सचिव तथा सूचना अधिकारी विष्णुकुमारी अधिकारीले जानकारी दिइन्। युएई भ्रमणमा भिजिट भिसामा जान चाहनेहरुका लागि त्यहाँ कार्यरत नेपाली कामदारका आफन्तले दूतावासमार्फत एनओसी जारी गर्दै आएका थिए। युएईमा रहेकाहरुले नजिकका नातेदार श्रीमान, श्रीमती, आमाबुबा सासु, ससुरा र छोराछोरीलाई ल्याउँदा दूतावासले उक्त पत्र जारी गर्ने गरेको थियो।
प्राप्त कागजातलाई नेपालमा अध्यागमन विभागले जाँच गरेर पठाउने भएपछि दूतावासले एनओसी जारी गर्न नपर्ने भन्दै यो रोक्न विभागले गृहमन्त्रालयलाई सम्बोधन गरी दूतावासलाई बोधार्थ पत्रचार गरेको थियो। सोहीअनुसार दूतावासले जारी नगर्ने निर्णय गरेको जनाएको छ। राजदूत कृष्णप्रसाद ढकालले सरकारको निर्देशन अनुसार उक्त सिफारिस जारी नगर्ने निर्णय गरिएको बताए। ‘सरकारले सम्बन्धित निकायमार्फत आगामी दिनदेखि एनओसी जारी नगर्नु भनेर निर्देशन पठाएको उनले बताए। उनले भने, हामीले सोहीअनुसार सोमबारदेखि नगर्ने निर्णय गरेका छौं।’ माथिल्लो निकायको निर्देशन कार्यान्वयन गरिएको राजदूत उनको भनाई छ। तर, एनओसी जारी गर्दा युएई दूतावासमा व्यापक अनियमितता भएको समाचार विभिन्न संचारमाध्यममा आएपछि रोक्न दबाब बढेको जानकारहरु बताउँछन्।