अत्तरियाको विजयनगर टोलमा सरसफाई
धनगढीः कैलालीको अत्तरियास्थित विजयनगर टोलमा सरसफाइ गरिएको छ।
शनिवार स्थानीयले विजयनगर गल्ली नम्बर २ को मुख्य सडकसँगै नालामा सरसफाइ गरेका हुन्। लामो समयदेखि टोलमा सरसफाइ नहुँदा दुर्गन्धित भएपछि सबै मिलेर सरसफाइ गरिएको स्थानीय कमला जोशीले बताइन्। उनले सरसफाइ गरिएको फोहर सडक किनारामा जम्मा गरिएको र नगरपालिकाको गाडीलाई उठाउन अनुरोध गरिएको बताइन्।
उनले सरसफाइ कार्यक्रम आगामी दिनमा निरन्तर रूपमा अगाडि बढ्ने बताइन्। स्थानीय परी नाथले स्थानीयलाई जागरूक गराउने उद्देश्यसहित सरसफाइ कार्यक्रम गरिएको बताए। यसअघि शुक्रवार बसेको स्थानीयका भेलाले टोलमा प्रत्येक महिनाका अन्तिम शनिवार सरसफाइ गर्ने निर्णय गरेका थिए।
सोही निर्णय अनुसार सरसफाइको कार्यक्रम सुरु गरिएको हो। सरसफाइ कार्यक्रमका लागि स्थानीय हर्क शाहले १० वटा कुचो, गोदावरी नगरपालिकाको स्वास्थ्य शाखाले १ सय पिस पन्जा र दिब्या किराना पसलले मास्क सहयोग गरेको थियो। सो टोलमा १५० भन्दा बढी घरधुरी छन्।
