सुदूरपश्चिम प्रदेशको बजेट कहिले हुन्छ पास?
धनगढीः सुदूरपश्चिम प्रदेश सरकारको बजेट पास भएको छैन्। सोमबार आर्थिक मामिला मन्त्री बहादुरसिंह थापाले प्रदेश सभामा पेस गरेको चालु आर्थिक वर्षको बजेट अहिलेसम्म पास हुन सकेको छैन्।
असार १ गते अघिल्लो सरकारले ल्याएको बजेट पारित हुन नसकेपछि अहिलेको सरकारले असार १ गते प्रस्तुत बजेट फिर्ता लिएर चालु आर्थिक वर्ष सुरु भएको २ महिनापछि मात्र अर्को बजेट ल्याएको हो। तर बजेटमाथि घनीभुत रुपमा छलफल हुन सकेको छैन्। दुई महिनादेखि बजेट शून्यतामा रहेको सुदूरपश्चिमले कहिलेसम्म बजेट शून्यताबाट पार पाउँछ भन्ने यकिन छैन।
प्रदेश सभा सचिवालयले बिहीबार सूचना जारी गर्दै शुक्रबार दिउँसो २ बजेका लागि बैठक आव्ह्रान गरेको थियो। तर शुक्रबार बिहान बसेको कार्यव्यवस्था परामर्श समितिको बैठकमा सत्तारुढ दलहरु कांग्रेस र एमालेकै सांसदहरुले समेत बजेट तथा कार्यक्रमहरुको विनियोजन न्यायोचित नभएकाले यथास्थितिमा पारित गर्न नसकिने अडान लिएपछि पूर्वनिर्धारित बैठक स्थगित गरिएको थियो।
एमाले र नागरिक उन्मुक्ति पार्टीको साझेदारीमा कांग्रेस नेतृत्वको वर्तमान सरकारले चालु आर्थिक वर्षका लागि ३१ अर्ब ६२ करोड ९८ लाख २८ हजारको बजेट ल्याएको छ। एउटै आर्थिक वर्षका लागि प्रदेश सभामा दुई पटक बजेट पेस गरिएको छ।
यसअघि चालु आर्थिक वर्षकै लागि असार १ गते तत्कालिन एमालेबाट आर्थिक मामिला मन्त्रीका हैसियतले सुरेन्द्रबहादुर पालले बजेट प्रस्तुत गरेका थिए भने सोमबार आर्थिक मामिला मन्त्री रहेका कांग्रेसका बहादुरसिंह थापाले बजेट वक्तव्य प्रस्तुत गरेका हुन्। तर बजेट पास गर्ने मिति टुंगो नलाग्दा अन्योल बढेको छ।
प्रदेश सभामा प्रस्तुत बजेटमाथिको छलफल अनिश्चित भएको सुदूरपश्चिममा दलहरुले शनिबारदेखि छलफल सुरु गर्ने समझदारी गरेका छन्। सत्तारुढ दलकै सांसदहरुले बिचौलियाको चलखेलमा बजेट निर्माण भएको भन्दै विरोध गरेपछि शुक्रबारका लागि पूर्वनिर्धारित बैठक स्थगित भएको थियो। शुक्रबारदेखि बजेटमाथि छलफल गर्ने भनिए पनि सत्तारुढ दलहरुबिचकै मतभेदका कारण बैठक बस्न सकेको थिएन।