राजीनामा माग्दै नेविसंघले गृहमन्त्रीको पुत्ला जलायो
काठमाडौँ: नेपाल विद्यार्थी संघ (नेविसंघ) ले उपप्रधानमन्त्री तथा गृहमन्त्री रवि लामिछानेको राजीनामा मागेको छ। सहकारी ठगी प्रकरणमा उनको नाम जोडिएको भन्दै नेविसंघले उनको राजीनामा माग गरेको हो।
उनको राजीनामा माग गर्दै नेविसंघले कीर्तिपुरमा पुत्ला समेत दहन गरेको छ। गृहमन्त्री राजीनामा दे, सहकारी ठग होसियार, सहकारी ठगर्ला कारबाही गर भन्दै नेविसंघका नेता तथा कार्यकर्ताहरूले राके जुलुस निकाल्दै पुत्ला दहन गरेका हुन्। नेविसंघ त्रिभुवन विश्वविद्यालय सभापति विष्णु बडैलाले गृहमन्त्रीलाई कारबाही नहुँदासम्म नेविसंघ चुप लागेर नबस्ने बताए।
उनीमाथि लागेका आरोपहरू संसदीय समिति बनाएर छानबिन गर्नुपर्ने अडान नेपाली कांग्रेसको रहेको भन्दै त्यो नहुँदासम्म आफूहरू चुप लागेर नबस्ने बताए। सहकारी ठगी प्रकरणमा गृहमन्त्रीको नाम मुछिएपछि नेपाली कांग्रेसले संसदीय छानबिन समिति बनाउनुपर्ने माग राख्दै आएको छ।
