धनगढीमा पहिलो पटक खो खोको उमेर समूहको प्रतियोगिता

धनगढी: नेपाल खो खो संघले पहिलो पटक उमेर समूहको महिला तथा पुरुष प्रतियोगिता आयोजना गर्ने भएको छ। प्रतियोगिता सुदूरपश्चिम प्रदेश खो खो संघको सह–आयोजनामा कैलालीको धनगढीमा सञ्चालन हुनेछ।

नेपाल खो खो संघका अनुसार, ‘प्रथम यू–२१ राष्ट्रिय पुरुष तथा महिला खो खो प्रतियोगिता’ चैत २४ देखि २७ गतेसम्म आयोजना हुनेछ। खो खोको राष्ट्रिय स्तरको कुनै पनि प्रतियोगिता पहिलो पटक मोफसलमा आयोजना गर्न लागिएको हो।

सुदूरपश्चिम प्रदेश खो खो संघले प्रतियोगिताको सम्पूर्ण तयारी पुरा भइसकेको जनाएको छ। नेपाल खो खो संघका अध्यक्ष प्रदीप महर्जनका अनुसार, प्रतियोगितामा कोशी, मधेस, बागमती, गण्डकी, लुम्बिनी र सुदूरपश्चिम गरी ६ वटा टोलीको सहभागिता रहने छ।