धनगढीमा ‘समाजसँगै एक्सिस’ भन्ने नारासहित रक्तदान
धनगढीः कैलालीको धनगढीमा एक्सिस विद्याश्रमले सामाजिक उत्तरदायित्व अन्तर्गत विभिन्न कार्य गरिएको छ।
विद्यालयले समाजसँग हातेमालो गर्दै अगाडि बढनुपर्ने भन्दै विभिन्न कार्यक्रम गरिरहेको छ। धनगढी उपमहानगरपालिका–५ हसनुपमा रहेको एक्सिस विद्याश्रमले ‘विद्यालय सामाजिक उत्तरदायित्व परियोजना’ चलाएको जनाएको छ। यो परियोजना अन्तर्गत समाजमा विभिन्न कार्यक्रम गरिरहेको विद्यालयको दाबी छ। एक्सिस विद्याश्रमले विगतदेखि नै हरेक वर्ष रक्तदान गर्दै आएको छ।
रक्तदान कार्यक्रम आयोजनाको सम्पूर्ण जिम्मेवारी विद्यालयमा अध्ययनरत विद्यार्थीले नै बहन गर्दै आएका छन्। यो वर्ष पनि विद्यालयले शुक्रवार रक्तदान कार्यक्रम आयोजना गरेको छ। रक्तदानबाट विद्यालयले ८५ पिन्ट रगत संकलन गरेर नेपाल रेडक्रस धनगढीलाई हस्तान्तरण गरेको छ।
‘रक्तदान महादान’ भन्ने विषयको बोध गराउँदै विद्यार्थीहरूमा समाजसेवाको भावना जगाउने काम समेत भइरहेको विद्यालयकी प्रधानाध्यापक अनिता पन्तले बताइन्। उनले बालबालिकामा विद्यालय शिक्षाले नै समाज सेवाको पाठ अनिवार्य सिकाउनुपर्ने बताउँदै रक्तदान लगायत समाजिक काममा विद्यार्थीलाई लाग्न अभिप्रेरित गरिरहेको बताएकी छन्।
