अत्तरियामा ट्रकको ठक्करबाट डोटीकी “कटी दिदी”को मृत्यु

धनगढीः कैलालीको अत्तरियामा ट्रकको ठक्करबाट एक जनाको मृत्यु भएको छ।

शुक्रबार साँझ धनगढीबाट अत्तरियातर्फ आइरहेको मप्र ०३०१ख९६५० ट्रकको ठक्करबाट डोटीको शिखर नगरपालिका–२ बस्ने ६० वर्षीया भगवती रोस्याराको मृत्यु भएको प्रहरीले जनाएको छ। ट्रकको ठक्करबाट गम्भीर घाइते भएकी रोस्याराको उपचारका क्रममा राति सेती प्रादेशिक अस्पतालमा मृत्यु भएको हो।

उनी डोटीमा “कटी दिदी”को नामले परिचित थिइन्। कैलालीमा उनी आफ्नो आफन्त कहाँ आएको र उनको मानसिक अवस्था ठिक नभएको बुझिएको प्रहरीले बताएको छ। ट्रक र चालक डडेल्धुराको अजयमेरू गाउँपालिका–१ का ३४ वर्षीय नरेश भण्डारीलाई इलाका प्रहरी कार्यालय मालाखेतीले नियन्त्रणमा लिएको छ। मृतकको शव परीक्षणका लागि प्रादेशिक अस्पतालमा राखिएको छ।