ट्र्याक्टर दुर्घटना हुँदा एक महिलाको मृत्यु, दुई घाइते
काठमाडौं: तेह्रथुमको लालीगुराँस नगरपालिकामा ट्र्याक्टर दुर्घटना हुँदा एक जनाको मृत्यु भएको छ। गएराति नगरपालिकाको लसुनेबाट वसन्तपुरतर्फ जाँदै गरेको प्रदेश १–०२–००३ त नम्बरको ट्र्याक्टर वसन्तपुर बजार छेउ जिरो प्वाइन्टमा दुर्घटना हुँदा ट्र्याक्टरमा सवार लालीगुराँस–७ सुङनामकी ४६ वर्षीया पवित्राकुमारी मगरको मृत्यु भएको प्रहरीले बताएको छ।
त्यस्तै चालक २२ वर्षीय जयन्तकुमार लिम्बू र ट्र्याक्टर सवार २२ वर्षीय ललितकुमार मगर घाइते भएका जिल्ला ट्राफिक प्रहरी कार्यालयले जनाएको छ। गम्भीर घाइते भएका दुवैलाई विपी कोइराला स्वास्थ्य विज्ञान प्रतिष्ठान धरान पठाइएको प्रहरीले बताएको छ।